منتدى الفرح المسيحى - ١٦ قاعدة للحب الناضج

https://upload.chjoy.com/uploads/160703353583731.jpg

١-الرضا أساس الارتباط .. انت مش بتتجوز الاحلي أو الاغني
، انت بتتزوج الأنسب ليك من كل ناحية ..

٢- حب بعقلك قبل ما تحب بقلبك.. لقاء العقول يدوم العمر ، أما لقاء القلوب بس محكوم عليه بالملل و الفناء و "حب التغيير" ..

٣-اوعي تمثل أو "تتكلف" .. خليك "نفسك" ، و اللي بيحبك يحبك و يشتريك زي ما انت ..

٤-اوعي تخاف ترجع في قرارك لو اكتشفت انك غير سعيد (لاي سبب) .. إنهاء العلاقة باحترام افضل ألف مرة من "المقاوحة" و "الإصرار الاهوج" علي إكمال علاقة فاشلة ..

٥-الرجل عاوز الست اللي تحترم رجولته و تحترم رأيه بالذات وقت ضعفه ، و الست عاوزة الراجل اللي يحترم أنوثتها و يحتويها و يكون رقيق معها ..

٦-اوعي تسمحي (للبنات بالذات) انه يهددك بالفضيحة علشان يورطك في علاقة "حب كاذب" .. ده ببشتهيكي و بس و ح يسيبك علي اول ناصية .. انهي العلاقة فورا و لو هددك بحجّة الفضيحة اوعي تخافي، "أفضحي الفضيحة" ، الجأي لسند موثوق فيه من العيلة ؛
فيه طرق قانونية ممكن تردعه ..

٧-لا تفرط في طهارتك قبل الزواج .. التبسط و التساهل هو البداية .. النتيجة فقدان الثقة و الشك و الورطة عند الرغبة في إنهاء العلاقة ..

٨-قبل ما تختار الحب ، اختار الصديق و الرفيق و الاب (او الام) ، و المربي و السند و من يحب ابوك و امك و يجلهم و يحترمهم..

٩-الصدق و الالتزام و الكرم و المرونة و البساطة من اجمل الصفات في الارتباط..

١٠-قليل من الغيرة جميل و طِعم ، لكن الغيرة لو زادت تبقي نار و تحّكم و قلة ثقة ، و تسبب إنهاء العلاقة ..

١١- اللي بيحبك يحب اهلك زي ما بيحبك ، و اللي يسيب أهله علشانك اوعي تصدقه و لا تآمن له ..

١٢-اهم زينة للرجل شهامته و التزامه و اهم أكسسوارات المرأة رجاحة عقلها..

١٣-اوعي تقول "أحبك" بسهولة .. لما بتطلع منك عقلك بيصدقها و يورطك و بعدين يعذبك لو اكتشفت انك غلطت أو اتسرعت ..

١٤-اهم من فهم من تحبه قدرتك أن تتفهمه و تقبله و تتعايش معاه ..

١٥-ما تسيبش حب قديم انهيته حي في قلبك ، ادفنه بكل جرأة و ارميه بلا رجعة مهما كان صعب

١٦-فيه حاجات تنهي العلاقة من غير تسويف: البخل ، العند ، عدم احترام الأهل، عدم الالتزام بالكلام أو الاتفاق ، الاستغلال ، السيطرة.. أسأل مشير خبير في الزواج قبل ما تكمل اي علاقة قلقاك..