منتدى الفرح المسيحى - ديله ، ممكن يتعدل

ديله ، ممكن يتعدل

https://upload.chjoy.com/uploads/160383463364321.jpg

مثل مصري قديم و معبر "ديل ال.... عمره ما يتعدل " ..

اشارة لطبع الإنسان اللي عمره ما بيتغير ..

حتي كلمة طبع جت من "طباعة" ، يعني حاجة ثابتة و ألوانها ما بتتغيرش..

و العيب غير الطبع، لأنه لسه في اوله ما بقاش عادة و ما اتحدش بتركيبة النفس.. مع شوية مجهود و تركيز و شغل امين ممكن العيب يتعدل ..

اما الطبع بيبقي جزء منك ، من لحمك و دمك و اعصابك و خلاياك.. الطبع فيه حتة امان و حماية و تشبث، تخاف تغيره لتفني و تقل..

علشان كده مثلا الدايت من أصعب ما يمكن لان جسمك بيقاومه، خايف يموت من قلة الاكل فيبطل حرق.. و اللي بيعمل دايت بيقعد مع طبيب حريف يقعد شهور و يمكن سنين يعدل و يبدل و يأكل و يجوع ..

تغيير الطبع عاوز ٣ حاجات ..

اولهم نعمة خاصة من الله ، اللي بيغير طبع الوحوش، اللي خللي موسي الغضوب أكثر الناس حلما علي وجه الارض ، و بطرس الخائف من اليهود كارز ليهم ، و زكا اللص يتبرع بنصف فلوسه للمساكين ..

التانية رغبة جادة و جهد امين و صبر طويل و شغل علي النفس ..

التالتة ، و دي مهمة جدا، أنك تصبر علي طبع غيرك و تتعايش معاه بذكاء ، لأنه هو نفسه مغلوب من نفسه، و برضه لأنك أنت نفسك محتاجه يتعايش مع طبعك..

التعايش المتبادل ذكاء متبادل ، يريحك و يريح غيرك ..

و لو صبرت و تعايشت مع د.... "طبعه" هو ح يصبر علي (اسف) علي د... "طبعك" (لمؤاخذة !!)

صح ؟؟