منتدى الفرح المسيحى - الطوبه الصغيرة في نظرك مفعولها بيكسر

https://upload.chjoy.com/uploads/159480134192961.jpg

من فترة كبيرة وانا ماشي بالعربية .. طوبة صغيرة اتنطرت من كاوتش العربية اللي قدامي وجت في ازاز العربية وعملت شرخ صغر جدا فيه ..
وعلشان مكنش باين ، ماهتمش بيه
لكن مع الوقت لقيت الشرخ بيكبر وبيمتد .. فجريت وغيرت الازاز فورا علشان مايتسببليش في ضرر
بحكيلكم القصة دي ليه !!
ياما كلام بسيط جدا بيتقال بيزعلنا وبيجرحنا
صحيح مش الجرح العميق ولا الزعل الجامد
لكنه للاسف بيتسبب في شرخ
وبالرغم انها بتكون كلمة صغيرة بايخه اتقالت وراحت لحالها ، لكن في الحقيقه مع مرور الوقت بنكتشف انها مارحتش لحالها ولا حاجه
طول ماهو مفيش اعتذار ولا تطييب خاطر حتى على الكلمة الصغيرة ، الزعل هايكبر والشرخ هايوسع ويكسرنا

عزيزي .. خليك حسيس على كلامك
وماتحدفش طوب من لسانك ..
الطوبة الصغيرة في نظرك ..
مفعولها لما بيمتد جوانا بيكسرنا .. وبتكون انت سبب