منتدى الفرح المسيحى

https://upload.chjoy.com/uploads/159311643875991.jpg

قريت ربنا بيقول ايه عن الطبيب ؟؟

أَعْطِ الطَّبِيبَ كَرَامَتَهُ، لأَجْلِ فَوَائِدِهِ فَإِنَّ الرَّبَّ خَلَقَهُ . لأَنَّ الطِّبَّ آتٍ مِنْ عِنْدِ الْعَلِيِّ
، وَقَدْ أُفْرِغَتْ عَلَيْهِ جَوَائِزُ الْمُلُوكِ. عِلْمُ الطَّبِيبِ يُعْلِي رَأْسَهُ، فَيُعْجَبُ بِهِ عِنْدَ الْعُظَمَاءِ." ( يشوع بن سيراخ ٣٨)

علشان كده ، تعظيم كبير قوي لأهلي و ناسي و تاج راسي
، لكل طبيبة و طبيب واقف في ميدان الحرب علي المرض ..

و التعظيم يزيد و يزيد قوي لما يكون الطبيب مصري ، ابن البلد الجدع و الحلو بزيادة ..

الطبيب اللي شاف اللي ما حدش شافه .. دراسة ما بتقفش لآخر العمر ،
و سهر و كد و عرق الليل قبل النهار ..

الطبيب اللي بينسي أسرته و ضحكته و راحته و حتي نفسه علشان يريح غيره ..

اللي ما بيلحقش يتهني بلقمته و لا فرشته.. اللي لازم يريح الكل علي حساب راحته
و يبقي في خدمة الكل حتي و هو عز نومه ..

الطبيب اللي بييجي علي بيته وولاده علشان يريح واحد في نص الليل
، و الطبيبة اللي حتي في حملها و رضاعتها بتتابع دراستها و امتحاناتها..

و يا ما امتحنت طلبة و دكاترة ماجستير و دكتوراه في عز مشاكلهم
و امراضهم ووفاة حد من عيلتهم و خافوا يؤجلوا الامتحان ليتأخروا عن دفعتهم..

مرة ناقشت رسالة دكتوراه لأحد تلاميذي الغاليين كان لسه بيتعالج من الكانسر
علشان يلحق الامتحان و يفرح عيلته، و مرة تانية ناقشت طبيبة محترمة جاية
و رضيعتها بين ايديها علشان ما يروحش عليها الامتحان و تتأخر شهور طويلة تاني ..

الطبيب المصري ده اتسحل و اطحن من اول عمره ما بين دراسة
و عمل و حياة قاسية ، بيعمل في أصعب الظروف علشان يريح الكل ..

اما لو غلط تتعلق له المشانق و يشوف الويل و الاهانة من الكبير و الصغير ..

الطبيب مش عاوز عاوز تماثيل و لا يفط شكر لانه اكتر واحد اتطحن ،
مش عاوز من اي حد غير كلمة تقدير واحدة : "شكرا"