منتدى الفرح المسيحى

https://upload.chjoy.com/uploads/158992534096021.jpg

انا ماشي لأنك لا فاهمني و لا حاسس بي ..

ماشي لاني باحبك و بأدي كل عمري و انت مش فارق معاك غير اللي بيريحك..

ماشي لاني كنت فاكر ان مفيش حد فاهمني غيرك ، و اكتشفت غير كده ..

انت فاهم أن زعلي من كلمة أو اتنين قلتهم، أو من رد فعل انت شايف انه ما يزعلش..
لا ..
الموضوع اكبر من كده بكتير قوي ، ان اللي جوايا مش فارق معاك و لا انت حاسس بي ،
و انا باموت نفسي علشانك ..

حتي و انت بتصالحني انت بس مش عاوزني ازعل، صلح علشان الزعل يخلص
، لكن اللي بتعمله هو اللي بتعمله ما بيتغيرش ، نفس القسوة في الرد،
نفس عدم الاحترام و الاهتمام ، نفس الجفا و الرفض ..

يادوب الزعل يخلص و تهدي المشاعر و تكرر اللي بتعمله في تاني و تالت و عاشر ..

و الغريب ان ضحكتك تعلي مع غيري ، و تريح الكل من معارفك و قرايبك و عيلتك ،
و تيجي لغاية عندي و تبقي واحد تاني ..

علشان كده ح امشي ..

ح امشي علشان ما احسش اني قليل كده قدام نفسي معاك ..
ح امشي علشان مش كل يوم احس بالوجع ده و الكسرة دي قدام حد باحبه بعمري و هو مش معايا ..

ح امشي و اسيبك لاهتماماتك و اللي بيريحك و يفرحك ، و مش ح اتعبك بزعلي تاني ..

ح امشي و انا قاعد جنبك ، و انا باكل معاك و انا بابتسم في وجهك .
. ح امشي و انت حتي مش ح تعرف لاني ح ابعد بمشاعري عنك و انا بادوس علي قلبي
و باستغني عنه ، قلبي اللي ذلني و خلاني احبك كل الحب ده..

ح امشي و اسيب معاك حته بتنزف مني مش ح أعرف اخدها و لا ارجعها..

و خايف الاقي نفسي من كتر وجعي مشيت خالص و مش ح تلاقيني تاني و لا ح أعرف ارجع تاني ..

ناس كتيرة حكت لي نزيف الرحيل ده اللي صغته في كلماتي دي ..
و أمنيتي انك تاخد بالك ان فيه ناس كتير خسرت أغلي حبايبها في صمت بعد سنين من الخلافات
، ناس من كتر الحب بتسكت و تمشي و تسيبنا حتي و هي جنبنا ..

و نفوق ما لا نلاقيهمش معانا ..