منتدى الفرح المسيحى - دموع علي وسادة الوجع

https://upload.chjoy.com/uploads/158887053077361.jpg

عارف يعني ايه واحد بسببك يحبس دموعه
، و يسيبها تنزل في سكون الليل علي مخدته ؟؟

معناها انك كسرت نفسه
، و لأنه و لا علي بالك أو لأنك أتجبرت عليه،
و لانه حساس قوي ما عرفش يعبر عن وجعه،
و شاله بين ضلوعه لغاية ما جه الليل ،
و ساب دموعه اللي حبسها تنزل علي مخدته من غير ما حد يشوفه..

عارف انت عملت فيه ايه ؟؟ دبحته بسكينة تلمة ،
حتي ما رحمتوش زي ما الجزار بيسن سكينته
قبل ما يدبح دبيحته علشان يرحمه من الألم الطويل ..

شوف رقة قلب السيد المسيح لما بطرس قطع ودن ملخس العبد
، شفاه في ساعتها و هو مقيد بالاغلال
و وقف موكب الفداء المهيب كله
علشان ما يسيبوش ينزف لحظة ،و ابرأها (لو ٢٢ ) ..

بس فيه ناس قلبها حجر ، سايبة وراها ناس بتنزف
، محروقة من الظلم و القهر و حبسة المشاعر
و الاحساس بالقهر و القلة و الترك..

و نفس الناس دي ، اللي شايلة قلبها و حاطة مكانه حجر صوان
، و مش حاسة بحد ، هي هي اللي تقعد تتباكي من ظلم الناس
، و هي هي اللي بتقعد تطلب من ربنا الرحمة و العفو
، و يمكن هي هي اللي طول النهار توعظ و تصلي
و تدي نصايح للكل !!

يا ظلمة ، تعذبوا الناس و تروحوا تناموا ،
و سايبينهم وراكم يبكوا في صمت و يداروا دموعهم
ورا ابتسامتهم المكسورة اللي بتغطي ذلهم و كسرة قلوبهم ..

معلش، اللي ظلمتوهم و ما حسيتوش بيهم
و قفلتوا قلوبكم قبل ودانكم عنهم ح يلاقوا قلب الله
يسمعهم في المخدع ..

و لو من قهرتهم ما عرفوش يصلوا، ح يجيلهم ملاك يجمع دموعهم
من علي وسادة الوجع و يرفعها لعرش الله
، معززة مكرمة ، صلوات صامتة مبللة بالألم،
تحفظ في سفر الرحمة تنتظر العدل و التعويضات..

الدور و الباقي علي عايش مش حاسس بحد
، و ما اسرع دورة الايام ، و ما اسرع اسرع عدالة الله ..