منتدى الفرح المسيحى - افرح لسه في ١%

https://upload.chjoy.com/uploads/158866635229911.jpg

بالرغم ان كل الكتبة و الفريسين كانوا ضد المسيح
لكن كان في ١% منهم عايز يسمع و كمل معاه للنهاية كان اسمه نيقوديموس.

بالرغم ان الكل هرب و سابوه وقت الضيقة
و القبض عليه و انكروه كان في ١% لسه ماشي بيسنده
و يسند اهل بيته و هو يوحنا التلميذ الذي احبه الرب.

بالرغم ان في عشرة برص شفوا و مشوا لكن كان في ١%
رجع منهم و شكر و مجد الله.

بالرغم ان الكل كان بيهتف ضده و بيقول اصلبه جه ١%
حتي لو كان بالامر و رفع عنه الصليب شوية و كمل من جواه المشوار و هو سمعان القيرواني.

بالرغم ان العسكر هزئوا به و اهانوه و بصقوا في وجهه
لكن كان في ١% و هو قائد المئة لونجينوس آمن بيسوع.

بالرغم ان مكان الجباية كان مليان عشارين
لكن ١% حس بالكلمة و قام تبعه و هو متي.

بالرغم ان كل الناس كانوا حوالين المسيح في زحام لكن ١% هي اللي قدرت تخرج قوة من المسيح بشهادته عنها
و شفيت من نزيفها و هي المرأة نازفة الدم.

بالرغم ان منظره مكنش يدل ابدآ انه أله في وقت ضعف علي الصليب و كل اللي يعدي يقوله خلص نفسك لكن ١% آمن به
و قاله اذكرني متي جئت في ملكوت و هو اللص اليمين.

بالرغم ان كل المشاكل حواليك بتقول خلاص
مش هينفع لكن في ١% عند ربنا.
بالرغم ان العالم بقي مليان شر لكن لسه في ١% خير.
بالرغم ان خطايانا كثرت لكن لسه في ١% ابيض و لسه نضيف و نقدر نرجع.
بالرغم ان (حط اي حاجة كده جرب) لسه في ١% حلو.
ربنا شغال ب ١% .. من طاقتك .. من ايمانك .. من حبك ..
من اي حاجة هيشتغل بيها.
من اي سمكتين و ٥ خبزات.

لو كان في ١% بس خاطئ كان المسيح بردوا
بذل نفسه علشان يخلصه ..
افرح .. لسه في ١% ..

"لأَنَّهُ تَعَلَّقَ بِي أُنَجِّيهِ. أُرَفِّعُهُ لأَنَّهُ عَرَفَ اسْمِي
. يَدْعُونِي فَأَسْتَجِيبُ لَهُ" ( مز 91 ).