منتدى الفرح المسيحى - اتعلمنا الأدب .. و لسه

https://upload.chjoy.com/uploads/158862023045521.jpg

كورونا فيروس اللي حجمه جزء من تريليون من الجرام ، علمنا الأدب..

يا ما كنا بنقعد بالشهور لا بنروح كنايس و لا بنتناول
، دلوقتي بنتنشق علي دقيقة نروح و نقبل بابها و بس ..
و بعد شوية ح نروح الكنيسة بعدد محدد
و بعد الموافقة و الترتيب الدقيق ،
و نمشي علي طول من غير لا سلامات و لا احضان .. ح نخشها بكل الخشوع و الاحترام و الاحساس بغلاوتها
، بعد ما عشنا شهور محرومين منها ..

ياما ضيعنا فلوسنا علي المظاهر في الافراح
، بقينا بعد الشقا بنعمل الفرح بإذن و ب ٦ معازيم بس
و لا حفلات و لا عزومات و لا مظاهر زينة و لا فساتين
و لا مصورين و لا حتي سلامات أو قبلات ..

ياما ضيعنا عمرنا علي الفلوس و استعلينا و استعفينا بيها .
. دلوقتي لا بتدينا امان و لا ضمان
، و اللي ساكن في قصر زي اللي ساكن في عشة،
لا مرض فاهمين و لا دوا عارفين و لا مصل لاقيين
، و مفيش غير الستر الالهي يحمي و بس ..

كنا متجبرين علي بعض، القوي يذل الضعيف
، الاخ بيكسر اخوه، و اللى عنده يتعزز علي ماعندوش ..
دلوقتي كله بيطلب ود الناس ، و خايف علي زعل اصغر حد
، و بيرحمهم و مستني رحمة ربنا عليه ،
لا يحصد من اذيته اذي، و هو مش ناقص..

و الخدام اتحرموا من الخدمة
.. كانوا بيشتكوا من تقلها و من صعوبتها..
دلوقتي الناس احلوت ، و بنتمني نخدم تراب رجليهم،
و نقابلهم علي النت و احنا مشتاقين لحظة رجوعهم..

اتعلمنا الأدب و لسه ح نتعلم ..