زوّادة اليوم: المقارنة
بيقول احد الكتاب: "المقارنة هيّي الحرامي اللي بيسرق كل الأفراح". من نحنا و زغار بيقارنونا بغيرنا، ليكو شو بيشبه بَيّو، هوّي اقصر من خيّو، بعمرو ابن عمتو كان صار يحكي هوّي ما بيقول و لا كلمة، ابن الجيران اشطر منّو بالمدرسة، ابن خالتو عمل حكيم و هوّي عمل رسّام شغلتو ما بتطعمي خبز، عاطول بيكون في حدا احسن منّك و عاطول انت الأقل و غيرك الأكتر حتّى اوقات بتقتنع انّو معن حق مع انّو مش مزبوط! بتصير تسخّف اكبر انجازاتك بس لأنّو هنّي قالو انّو غيرك بيعمل اكتر!...بتكبر معنا هالشغلة و مع انها بكتير محطات بحياتنا زعجتنا بس بتصير عايشة معنا و منصير نعملها مع غيرنا بدون ما نقصد منصير نقارنن بغيرن و منضيّع فرصة نشوفن عا حقيقتن الحلوة. ما تخلّي حدا يكسرلك صورة الله اللي فيك، ربنا عطاك ياها حتّى تعكس صورتو عالأرض و ما تقبل بأقل من هيك!...ما تقارن و ما تتقبل تتقارن حتّى تفرّح و تفرح...الله معكن.