زوّادة اليوم: كلنا أخوة تحت سما وحدة

بيخبرو عن عيلة سمك الأهل لونن احمر و الولاد كلّن حمر إلّا سمكة وحدة لونها اخضر. كل القرايب و الجيران بيتطلّعو فيها بطريقة بشعة و بيقولو انّو هيّي مش منّن! شو ذنبها هالزغيرة حتّى تتحمّل كل هالقساوة عا شي مش هيّي اصلا اختارتو و لا الها دور فيه! كم شخص حول الأرض بيتعرّض لهالنوع من المعاملة بس لأنّو ما بيشبه المحيط اللي هوّي فيه؟ كم طفل صار ما بدّو يروح عالمدرسة لأنّو رفقاتو بيتنمّرو عليه كرمال لون بشرتو؟ كم عاملة خدمة منزلية بتتعذّب و بتنهان بكلمات بعيدة كل البعد عن الإنسانيّة؟ و غيرها من الأمثلة اللي ما بتخلص...الزوّادة اليوم بتذكّرنا انّو الله خلقنا كلنا عا صورتو و مثالو، مين نحنا لنقيّم مخلوقاتو و نصنّفن و نتجبّر عا مشيئتو!؟ يا رب انصر كل مظلوم و كون رفيق كل شخص تَرَكو المجتمع وحيد و نوِّر قلوب و عقول الكل تا يفهمو انّو كلنا اخوة تحت سما وحدة...الله معكن