زوّادة اليوم: هالتجربة شو غيّرت فينا ؟

غمضو عيونكن لثواني...تخايلو للحظة انّو هلق راح خطر كورونا و وقفو كل التدابير و رجعت الحياة لطبيعتها! فتحو عيونكن هلّق و صلّو بكل امل و رجا!
يا رب انت بتعرف قدّيش ناطرين هاللحظة! قدّيش تعبنا من الكمّامة و الكفوف و الزربة بالبيت و الخوف عاللي منحبّن و تعقيم اقل غرض قبل ما يفوت عالبيت و ياكلنا الهَم اذا عطسنا او سعلنا او وجعنا راسنا و نقعد نتذكّر اليوم شو و اذا نمرة سيارتنا بتسمح نروح نجيب غراض و نتحرقص الأحد بوقت القدّاس قاعدين بالبيت! صار الوقت نقيّم حالنا و نشوف هالتجربة شو غيّرت فينا؟ صرنا ناس احسن او لأ؟ يا رب بيقولو انّو الدهب بيمتحنو بالنار، نحنا هلّق بنصّ النار، عطينا يا رب نطلع منها دهب و ما تخلّي ضعفنا يغلبنا!...يا رب تشفي كل شخص انصاب بالفيروس و ترحم كل شخص انتقل من بيناتنا بسببو و تحمي كل الباقيين...الرب يتقبّل منكن...الله معكن