منتدى الفرح المسيحى - مين اللي قفل الكنيسة؟

مين اللي قفل الكنيسة؟

https://upload.chjoy.com/uploads/158489632795341.jpg

مش المجمع ومش كورونا
اللي قفل الكنيسة احنا
زمان والي البلاد قفل الكنائس وراح الاسقف يتحايل علي الوالي افتح لنا نصلي قداس ساعتين بس ولما وافق الوالي الاسقف جمع الشعب وراحوا الكنيسة في الوقت المحدد بس معرفوش يفتحوا باب الكنيسة والوقت المحدد فات وقف الاسقف يبكي لربنا بقي يارب الوالي الظالم يوافق علي فتح الكنيسة وانت يارب متوافقش فسمع صوت بيقوله انا اللي قافل الكنيسة مش الوالي علشان الشعب مش بيعبدني بقلب مستقيم لما يرجعوا لمحبتي هافتح الكنيسة والشعب رجع بتوبة ودموع واتفتحت الكنائس
ربنا ده اسمه ضابط الكل القادر علي كل شئ
ومن ذا الذي يقول والرب لم يامر
ربنا موافق علي القرار ده لانه زعلان منا
زعلان من عدم مخافتنا ليه بنخاف من كل حاجة الا من ربنا لانه طيب وحنين وبيسامح ونسينا قول بولس الرسول ( أم تستهين بغنى لطفه وإمهاله وطول أناته، غير عالم أن لطف الله إنها يقتادك إلى التوبة" (رو 2: 4)
ربنا زعلان من قسوة قلوبنا علي بعض ومن عدم محبتنا للبعض وعدم امانتنا في علاقتنا بيه وفي علاقتنا بالاخرين وفي اشغالنا زمان كنا علامه مميزة في كل شغل بسبب الامانة والان يجدف علي الاسم الحسن بسببنا
زعلان من عدم احترام بيته زعلان علشان مقدم جسده ودمه كل يوم علي المذبح واحنا مشغولين عنه حتي لما نروح سرحانيين ومش مركزين معه ( هذَا الشَّعْبُ يُكْرِمُنِي بِشَفَتَيْهِ، وَأَمَّا قَلْبُهُ فَمُبْتَعِدٌ عَنِّي بَعِيدًا،)
اهمالنا صلواتنا وكلمة ربنا ومحبتنا بقيت برده
بندين بعض وبنتكلم علي بعض وبناذي بعض وبنفتخر ونتعالي علي بعض وحتي في خدمتنا بيكون همنا ذاتنا قبل خلاص المخدومين
برد ورعد وسيول وقليل اللي فائق
وناس بره بتموت بالالاف وقليل اللي فائق
لحد ما اضطر ربنا الحنين يقفل باب بيته يمكن نفوق
فيرس كورنا بيموت في درجة حرارة ٣٠ واحنا علي غير العادة لينا كم سنة الايام ديه بيدخل فيها الصيف لكن الجو معكس السنة ديه وبرد حامد تفتكروا ده صدفه؟؟
يارب رجعنا ليك وماتحرمنا من بيتك وجسدك ودمك
تعالوا كلنا نقدم توبة بانسحاق واتضاع ونعترف بخطايانا واللي فكرين انها سهوات وهفوات ندقق ونعترف بها
تعالوا اللي حد زعلان من حد او مزعل حد يروح يصلحه
تعالوا نرجع نكون امنا في علاقتنا مع ربنا والاخرين
تعالوا نقدم لربنا صلاة بدموع ونفتح كتابه المقدس نشبع من كلمته اللي تنقينا وتفرحنا
ماذا لو صحينا بكره ولم نجد الكتاب المقدس ايضا ؟؟؟
تعالوا ندور علي خلاص الاخرين كل واحد فينا مدفوع فيه ثمن غالي اوووووووووي مدفوع فيه دم المسيح
تعالوا كل يوم نصلي مع بعض الساعة ١٠م ونعمل تمجيد للست العدار ونقولها تشفع فينا ربنا يفتح ابواب الكنائس ومايحرمناش من جسده ودمه
هو قال ارجعوا الي ارجع اليكم
تعالوا نرجع ونفرح قلب ربنا
كفاية كلام وكفاية اخبار وكفاية انشغال كفاية خوف احنا الهنا ضابط الكل القادر علي كل شىء هو ابونا السماوي محب البشر