منتدى الفرح المسيحى - عزيزي أنا بعد التحية وحشتني

https://upload.chjoy.com/uploads/15822807315531.jpg

عزيزي " أنا "
بعد التحية ...
وحشتني ..
حاسس كأننا ماتقابلناش من سنه
من وقت ما أنت سيبتني ..
من وقت آخر حضن
آخر ضحكه
آخر شوف
من وقت تلميس الكفوف
من وقت آخر مره كنت انت هنا ..
اسمحلي احكيلك واقولك ايه حصل
جرّبت انا كل الحلول الممكنه
وجريت على اخر أمل
انا مش كويس يا أنا ..
وحشتني ..
وحشتني اوي يعني اكتر من الطبيعي
و واحشني شكلي وانا بموت من الضحك
وانا بلعب معاك
واحشني صوتي اللي انت خدته معاك هناك
عزيزي " أنا " هو انت فين ؟
هو انت ليه ماليان قسى
مش انا اللي كنت بروح معاك المدرسه..
ونقف طابور ..
وامضي مكانك في الحضور ..
مش انا اللي كنت بقف قصادك في المرايا ؟
مش انا اللي وانا خارج كتير خدتك معايا ؟
ومخدتنيش ليه وانت ماشي هناك بعيد ؟
عزيزي أنا ..
اسمحلي اقولك ايه الجديد ..
اول يومين انا كنت عادي
كنت بتنفس وبمشي كنت لسه بروح وباجي
بعدين في تالت ليله حسيت اني مش مظبوط
في حاجه وحشاني ومش عارف دي ايه
ووقت ما اصحى بحس حاجه تشدني
ارجع مكاني كأن انا مربوط
اسبوع على الحال ده وبكابر
وبشوف وانا بموت بالبطيء
بصحى يوماتي ناقصني شىء
مش إيد ورجل ..
بصحى ناقصني ذكرى
ناقص ضل ..
وبدأت أتلاشى واقل واقل ...
مفضلش مني غالبا الا الكلام
والله واحشني اوي
هو انت فين ...؟؟
" انا مش تمام "
واه.. صحيح ...
مسألش عنك اي شىء طول الغياب
الناس ليها الظاهر ومالهاش العذاب
وأنا حاولت اضحك شبه ضحكك وعدت
يمكن محدش حس فرق ولا اخد باله
يمكن داريت بصعوبه ذكرى فيا واتهدت
ثم اكتشفت ان كله بيبكي على حاله ..
لاحد عمره هيسأل ولاّ هيلاحظ
الفرق بينك وبيني يجي الف سنه
انا الوحيد اللي حاسس غربتي فيا
وانا الوحيد المُطالب انه يبقى أنا ..!!!
عزيزي " أنا "
قلّدت صوتك في قاعده أول امبارح
ومسكت تليفونك وقلّبت الصور ..
أغلبهم اتغير وليه انت اللي ثابت ؟

حقك تغيب .. انا لو مكانك كنت اموت
لكن تعالى وحشتني
مبقتش قادر امثل اني سليم
وتعبت من اني أسدّ فراغ كبير
وتعبت اقول للناس مفيش حاجه
بالكدب والله لأنه فيه كتير !
وتعبت اتحايل عليا واقول هعيش
وتعبت من قولة مفيش
ويومين وهبقى تمام
وهعيش انا حياتي
وانا مش تمام خالص
خالص تحياتي !
،،ياانا،،