منتدى الفرح المسيحى - خللي بالك من الغي

https://upload.chjoy.com/uploads/157394064979741.jpg

افكار الغى

أفكار مشوهة كتير بتلخبط المنطق في النفس البشرية ..
و أحيانا كتير العقل بيشوف و بيسمع و يستنتج حاجات مش موجودة أو عكس الموجودة..

و ده بيخللي المنطق غايب و الحقايق مشوهة ..

ملحوظ ده قوي في الخلافات بين الناس ..
كلمة ممكن تتقال و يتفهم عكسها و يبدأ الخلاف القاتل ..

فيه كده نفسيا ، لأن العقل بيشوف و بيسمع اللي هو عاوزه ،
مش الحقيقة علي ما هي عليه ..

بص في حرب ابليس علي الجبل مع السيد المسيح ..
مرة يقرأ له آيات بطريقة غلط ، لما كلمه انه يرمي نفسه فالملايكة تشيله
(حتي كلمة الله ممكن الشرير يضللنا و احنا بنقراها )
، و مرة اراه جميع ممالك العالم و اغواه انه ياخدها
(يعني يقدر يغوي العقل و يهيء له اشياء مش موجودة في الحقيقة ) ..

ده اللي سماه الكتاب " روح غي (اشعياء ١٩)

، و دي من أصعب الحروب أو التحديات النفسية و العقلية و الروحية ..

عرفت ليه مرات تفهم كلام علي عكس معناه ،

و تبتدي الخناقات و تخسر اعز الناس ؟؟

لان مرات كتير عقلك يضللك و يتوهك..

الغي ده برضه اللي بيخليك تختار غلط في الارتباط،
فيوريك حد انه حلو قوي و هو كله عيوب
و ما ينفعكش أصلا و بيضحك عليك و يستغلك

، و يخليك تقف ضد المنطق و ضد اهلك ، و مرات حتي ضد مرشدك ..

ده برضه اللي بيخليك تاخد قرار غلط في الهجرة و الشغل و السفر و الشرا و البيع..

صلي كتير، و استشير كتير، و افتح قلبك وودنك ،

و اوعي عقلك يزن علي حاجة تتمسك بيها،

لأن زن الأفكار اول طرق ضلال الأفكار ..

خللي بالك من الغي..