منتدى الفرح المسيحى - مش لازم تخالف علشان تُعرف

https://upload.chjoy.com/uploads/157307926330241.jpg

"خالف تُعرف" ، كلمة متداولة و عرف سايد..

تلاقيه اكتر ما تلاقيه في تعليقات الفيس بوك ..

مثلا بوست فيه تأمل، تلاقي الكل يشوف فيه فوايد كتيرة لنفسه،
و يطلع لك واحد ما تفهمش منين ،
يألف من كلمات البوست ١٠٠ غلطة من دماغه:
طقسية، و كتابية و روحية ، و يحرف الكلام حسب مزاجه ؛ و يقعد يستعرض معلومات ما لهاش اي دعوة بأي حاجة في اي حاجة.
. المهم يغلطك و يقول للناس "انا هنا" ..

أو فيديو فيه رأي مفرح أو قصة مبهجة ،
يسيب كل الكلام و فوايده و يعلق علي كلمة واحدة اتقالت
، و يطلع الكلام معثر ، و الضحك حرام ، و الوقار مطلوب
، و يدي الناس درس عن العثرة اللي حصلت له
و يستخدم اصعب الكلمات و اغلظ كلمات الهجوم
(قال يعني كده بقي قدوة و معلم ) ..

كمان ممكن رأي ينزل عن المشاكل الشخصية أو العائلية
، تلاقيه يسيب كل الدروس المكتوبة ،
و يهاجم و ينقد و يقول اي كلام المهم عكس اللي مكتوب و خلاص ..

المثل اللي قال "خالف تُعرف" عتاب عاوز إعادة صياغة ..

علي فكرة ، ممكن تُعرف من غير ما تخالف .. تُعرف بأخلاقك و أدبك و خدمتك للناس ؛ تُعرف بذوقك و كرمك و شهامتك.. تُعرف بامانتك و تسامحك و عدلك و حسن معشرك و جميل صفاتك و فضايلك..

خلليك حلو علشان تُعرف ..