زوّادة اليوم: عيد رئيس الملائكة

بتحتفل الكنيسة بعيد رئيس الملائكة ميخائيل ب6 أيلول. هالعيد هوّي تذكار للاعجوبة اللي عملها مار مخايل بمدينة كولوسي. هونيك كان في كنيسة عا اسم مار مخايل و حدها في حوض مَي بيجو الناس لهونيك بيطلبو نعمة الشفاء من امراضن، بيرسمو علامة الصليب و بيطلبو شفاعة القدّيس. مرّة اجا زلمي وَثَني بنتو الوحيدة خلقت خرسا، شاف كيف الشفاءات عم تصير قرّب و سأل الناس شو بتقولو بس تلمسو المَي؟ جاوبو: " باسم الآب والابن والروح القدس، وشفاعة ميخائيل رئيس الملائكة".
عمل متلُن و شِفْيِت بنتو. صار مؤمن بعد اللي صار معو و هالشي زعج كتير الوثنيين و قرّرو يحَولو المَي عالكنيسة بالليل حتّى يهدموها. لمّا بلّشو ينفذو خطّتن ظهر الملاك ميخائيل و ضرب صخرة كبيرة بالعصا تبعو سكّرت مجرى المَي و خلّص الكنيسة من دمار اكيد. و من وقتها صرنا نعيّد هالعيد و نطلب دعم مار مخايل بكل معارك حياتنا...شفاعتو ترافقكن و الله معكن