منتدى الفرح المسيحى - دي نقرة و دي نقرة

https://upload.chjoy.com/uploads/156501829669161.jpg

جملة بتتقال لما حاجتين عكس بعض واحد بيعملهم، و عاوز يبرر موقفه و ضميره!!

خادم أو شماس مثلا نشوفه جوه الخدمة بجناحين، و بعد ما يخلص دوره،
يشيل المكياج و معاهم الجناحين و يبطل ينقط زيت، و ياخد شكل تاني خالص
، عنف و غضب و كره و انانية و كبر و نميمة و تذمر و عدم احترام للكل ..

هو نفس الشخص "المتدين الشكلي ده" ، لما تخش معاه في تعاملات مادية يسرق
و ينصب و يخنصر، و يمصمص اللي في جيوب الناس ، و فاكر ان ماحدش واخد باله ..

و هو نفس الشخص ده كمان ممكن يكون مزعل شريك حياته
و معذب ولاده و مطفشهم و مكرههم في الحياة الروحية و في الدنيا كلها ..

و لما تسأله يقولك: دي نقرة و دي نقرة !!

الانسان الصادق ما عندوش شكلين ، هو شكل واحد بس ، يقدمه لكل الناس .
. اللي عنده "نقرتين" ، و ازدواجية في التعاملات ،
هو ده اللي تاعب نفسه و تاعب الناس ، و بيعثرهم..

لو لقيت نفسك "اتنين" ، بتغير شكلك علشان في جو المتدينين، صوتك يبقي هادي
، و الأدب كله يجيلك، و لما تخلص ترجع للونك الأصلي او "لموطنك الاصلي" تبقي مزيف
، متلون، و لازم تراجع نفسك قبل ما تصدق كدبتك و ما تشوفش الفصام الروحي
اللي عندك و انت مش داري ..

مفيش غير "نقرة" واحدة ، و اللي يقول انه بجد متدين ،
يورينا اخلاقه و امانته بره "مكان تدينه" مش بس جواه ..