منتدى الفرح المسيحى - و بعد كل ده يروحوا ينصحوا الناس يربوا عيالهم ازاى!!!!!!!!

بص احنا هنربيك بالضرب عشان من غير ضرب يبقى هتطلع عيل صايع و ماشى على حل شعرك..
و هنشتمك و نقلل منك قدام الناس عشان متتكبرش على خلق الله.. و تطلع عيل سوى..
و أوعى تفتكر أن ده ضغط علينا و بنطلعه فيك و لا أن ده اتعمل فينا و احنا صغيرين فابنعمله فيك.. لأ اوعى🙊🙊 احنا بس بنربيك انت أيش فهمك انت.. انت لسا صغير و لما تكبر هتشكرنا..
و بص اوعى تيجى فى يوم تعبر عن احتياجك لحنية و لا اهتمام مننا عشان هنديك فوق دماغك..
و لو فكرت تطلع تاخده من برا هننفخك و نطلع عين أهلك و نغلطك بس برضه مش هنديك احتياجاتك..😁
و هنشتم و نهين بعض قدامك بس انت لازم تطلع محترم
و هنكدب قدامك بس انت لو كدبت علينا تبقى عيل مش متربى
و هننصب و نتكلم ع طوب الأرض بطريقة زى الزفت لكن انت بقك مينفعش ابدا تطلع منه العيبة
و بقولك ايه.. أنت لازم تطلع ناجح و متفوق و تخش طب عشان الناس تقول أبو الدكتور راح ام الدكتورة جت.. ما احنا لازم نتفشخر..
و لازم تبقى ماشي ع سنة الحياة بتاعتنا كلنا.. تدرس تخس كلية تتخرج تتجوز و تخلف و بعدها تتحرق تولع ب جاز مش مهم المهم نكون اطمنا عليك 😑
هنتخانق قدامك بس انت مينفعش تطلع معقد
و هنطلع عقدنا عليك كل يوم و نظلمك و نجحدك و انت صغير بس لما تكبر لازم تحترمنا امال ايه..
و بص احنا مش هنديك مشاعر و حجات معنوية.. مادية بس و لو جيت فتحت بقك هنقولك هو احنا حارمينك من حاجة!!
ده انت غريب اوى ياخى..هما حارمينك من حاجة!
تيجى تكلم حد منهم يقولك ما احنا اتربينا بنفس الطريقة و لا أنت احسن مننا و لا تكونش يعنى احسن مننا..و هما اصلا طالعين معقدين و حالتهم زفت و يقولك ما احنا طالعين زى الفل اهو 😏😏
احنا هنسرق منك طفولتك و برائتك بدرى بدرى.. و هنكبرك بمشاكلنا و عقدنا الل هنتكلم عنها و نحلها و نقطع فروة بعض قدامك..
و بعد كل ده يروحوا ينصحوا الناس يربوا عيالهم ازاى!!!!!!!!