منتدى الفرح المسيحى - إنها التربيه يا ساده

https://upload.chjoy.com/uploads/155909012957541.jpg

* الأبوه مش دليل او "ختم مجتمعى" على انك راجل حقيقى
* الأبوه مش سلطان سيطره و تحكم فى كائن ضعيف صغير غير قادر على التعبير عن نفسه.
. مش انه كائن "تمليك" ربنا اداهولك تعمل فيه اللى انت عايزه
* الأبوه مش انك بتربى انسان يحققلك احلامك لما يكبر او يوصل للحاجات
اللى انت ماقدرتش توصلها فى حياتك
* الأبوه مش تطور طبيعى لحياتك انك كبرت و بقيت راجل و اتجوزت ف "خلفت"

ركز فى اللى جايه دى وحياة والدك..

*الأبوه مش لبس غالى و لعب غاليه و مدارس كويسه.
. الموضوع مش مجرد انك تبقى ناجح فى شغلك و قادر تصرف على بيت وعيال
و تأمنلهم مستقبلهم.. القصه فعلا" أكبر من كده بكتير

ايه هى الأبوه الحقيقيه (من وجهة نظرى المتواضعه جدا")

#الأبوه_الحقيقيه بالنسبه لى هى "تكليف إلهى" و شرف عظيم ربنا اداهولى
انى اكون مسئول مسئوليه كامله عن حياة انسان تانى

#الأبوه_الحقيقه انك تساعده يعيش طفولته و ينطلق و يلعب و يضحك..
. انك تسيبله براح و حريه انه يكتشف نفسه و العالم الواسع اللى حواليه

#الأبوه_الحقيقيه هى سلطان محبه و قبول غير مشروط لإبنك طول الوقت علشان
يطلع انسان سوى قابل نفسه و متصالح معاها و بالتالى يقدر يقبل الآخر
و يكون متصالح معاه لما يكبر

#الأبوه_الحقيقيه هى حضن دافى مفتوحله طول الوقت لما يكون غلطان
و عاكك الدنيا قبل لما يكون كويس و شاطر و ناجح

#الأبوه_الحقيقيه هى رحله بتبتديها مع ابنك من يوم ما بتاخد قرار انك جاهز
تبقى أب (مش لما فجأه تلاقى نفسك شايل عيل و بقيت أب)؛
رحله طويله.. رحله فيها بتساعده يعرف نفسه و يكتشف مواهبه..
رحلة تأهيل و تمكين...انك تمكنه ازاى يتعامل مع صراعاته و تحدياته النفسيه...
و بالتالى تمكنه من انه يتعامل مع الدنيا و الناس...

الأبوه_الحقيقيه هى بحر واسع من الحب و التشجيع المستمر

و التفاعل و التواجد الحقيقى فى حياة ابنك

الأبوه_الحقيقيه انك تحمى ابنك من صراعاتك الشخصيه
و تحدياتك النفسيه... انه تسيبه "حر و منطلق