منتدى الفرح المسيحى - التدين و فن النكد

التدين و فن النكد
د.مجدي إسحق
عارف ان المقال ده حساس ، و عارف برضه أن كتير ح يفهموه و كتير ح يتسائلوا: ايه معني العنوان ده ؟؟
المعني أن فيه ناس بتقدم الدين ، غالبا من غير ما تقصد(مش اكيد!!) بطريقة النكد ..
مثلا ، اول ما نلاقي الناس مبسوطة في اي حاجة نقية و بسيطة : شوية لعب، أو بيضحكوا مع بعض ، أو بيقولوا كام نكتة بريئة ، يطلع المتدين "النكدي" و يبتدي وعظة من نوعية : فكروا في آخرتكم ، أجرة الخطية موت ، كفاياكم وقت ضايع و يللا نصلي ..
كان حقة الخادم ده شاركهم في لعبهم و ضحكهم الأول و بعدين يحببهم في الصلاة و العبادة بالراحة قوي قوي و من غير اي هجوم أو عنف أو فرض ..
مثال تاني : طالعين مؤتمر شباب اول مرة يحضروا قداس، و لا واحد فيهم حافظ ألحان ولا حتي يعرف يقرأ قبطي(و يمكن عربي !!) ، و يجي المتدين النكدي ينقي كل الألحان الطويلة اللي ما فيش حد حافظها إلا هو (و يمكن هو نفسه ملصمها بالعافية و ملخبط فيها) ، و يقعد يقولها لوحده، و بعدين يقعد يزعق في الشباب اللي ساب القداس و طلع ، أو نام أو زهق و قعد يرغي مع زمايله لأنه مش فاهم وواقف زي قلته..
لو كان حكيم ، كان خللي الألحان السهلة في المرات الأولي، و كان خلاهم يشاركوا في القداس بحاجات بسيطة، و خللي القداس بسيط علشان يحبوا الصلاة ؛ و لما يتعلموا يبقي يطول زي ما هو عايز بس و هم فاهمين و مشاركين ..
المتدين هو الحكيم ، السهل الممتنع ،و هو صانع البهحة ..
مش كده و لا ايه