منتدى الفرح المسيحى - ليه ما بيقولش

https://upload.chjoy.com/uploads/154936032536781.jpg

سؤال محير ناس كتير ، ليه ربنا ما بيقولش للناس امتي و ازاي ح يحل مشاكلهم ؟؟
مشاكل كتيرة بنصلي لها ، و ما بتتحلش ، و مشاكل بتصلي لها و بتتحل بعد زمن طويل .
. ما كان ربنا يريحنا و يقول لنا علي اللي مش يتحل فنبطل نصلي و نقبل الوضع ،
و يقول لنا علي معاد و طريقة اللي ح يتحل فنبطل قلق و ننام مطمنين !!

مثلا : لو عرف الشعب أن الله ح يشق البحر ما كانوش اترعبوا قدام جيش فرعون اللي كان بيطاردهم
.. و لو كان إيليا عرف أن ايزابل اللي هددته بالقتل
هي نفسها ح تتقتل بعد شوية ما كانش اكتأب و طلب الموت لنفسه من كتر الحزن
، و لو كان داود عرف أن شاول ح يموت في الحرب ما كانش هرب منه عند الفلسطينيين لمدة ١٦ شهر
. و لو كان التلاميذ عرفوا أن المسيح جاي لهم في الهزيع الرابع من الليل ما كانوش عاشوا ساعات معذبين..

الحكاية أن ربنا محدد زمان محدد لحل كل مشكلة ، و عاوزنا نصدق حكمته و خطته من غير ما يقول لنا ..
مش لازم يقول ، كفايه انه يوعدنا أن مشاكلنا هي مشاكله ، و هو مسؤل عن حلها ..
و عنده دايما حل من ٣ :
الاول مشاكل ح تخلص بضيقتها فعلا بسرعة و دي بتوريك احسانات الله ..

التاني : مشاكل ح يتأخر حلها شوية ، و دي بتعلمنا الصلاة و اختبار محضر الله ..

التالت : مشاكل ح تخلص بس من جواك، ح تخلص بأن ضيقتها جواك تختفي ،
و دي بتغيرك انت من جوه و تشكل شخصيتك و تنقي عيوبك و تهذب سلوكك ..
صح ؟؟