منتدى الفرح المسيحى - زوّادة اليوم : الناس أجناس

زوّادة اليوم: الناس أجناس
في ناس مش بإرادتك بيفوتو عا حياتك...اوّلن اهلك مش انت نقّيتن، و قرايبينك و اخواتك، و رفقاتك بالصف بأوّل سنة مدرسة، جيرانك، اساتذتك، زملائك بالشغل و غيرن و غيرن ...منّن منحبّن و منتعلّق فيهن، منّن يمكن ما نتّفق معن كتير، و منّن متل ما فاتو عا حياتنا بالصدفة بيفلّو منها بلا ما يتركو اثر و في ناس اذا فلّو بياخدو معن شقفة منّا و تأثيرن بيعلّم كتير، منّن بيِجو بوقتن و منّن بيتركونا بكّير...
في ناس يمكن ما منعرفن نلتقي فيهن عالطريق نحسّ بوجعن من عيونن و ناس منعرفن من سنين ما نعرف نقرا بعيونن...في ناس اكيد مش متل غيرن، و في ناس ما منتخايل حياتنا بدونن و في اشخاص قد ما شكرناهن منضل مقَصْرين و في ناس منجرّب طرقاتنا ما ترجع تلتقي ابدا و في ناس يمكن منندم انّو عطيناهن ثقتنا و ما كانو قدها...
آمنو انّو كل شخص ربنا حطّو بطريقنا لسبب معيّن اذا ما فهمناه اليوم رح يجي يوم و نعرفو، ما في حدا عهالأرض ما عندو مُهمّة يعملها...اذا بعد ما لقيتو حالكن و ما عرفتو دوركن عَلّو راسكن صوب السما هونيك بتلاقو اجوبة عا كل اسئلتكن...الله معكن