منتدى الفرح المسيحى - سلطان الظلمة.

https://upload.chjoy.com/uploads/154370377445281.jpg

فيه ساعة اسمها "سلطان الظلمة" (لوقا ٢٢ و كولوسي ١) .
. ساعة الشيطان بيجيش كل جنوده للحرب.. قال عنها بولس في افسس ٦ "اليوم الشرير" ..

ايه المعني؟؟
المعني أن فيه حروب يومية علي ولاد ربنا ، لكن فيه فترة الشرير بيكثف الحرب، زي "الغارة" ..
هجوم متواصل و مكايد ورا بعض ..
و الحل ؟؟
اولا الحل الوقائي أن الإنسان يخزن نعمة و عتاد، يستعد من قبل الحرب
: صلاة كتير و كتاب مقدس و تناول و صوم و توبة و خدمة..
كل ده خزين يملا القلب و العقل و يخليه جاهز للمقاومة..

اما بقي وقت "الدك" و "الضرب" و الهجوم المكثف، تتغير الاستراتيجية شوية :
برضه صلاة لكن مع سجود و اتضاع شديد و انحناء أمام الله ..
برضه كتاب مقدس بس بترديد آيات كتير و ملء الفم و العقل بيها..
كل حاجة كتير، تناول كتير و صوم كتير و خدمة و حب كتير..
لكن المفتاح الحقيقي الاقوي لو عاوز سره اقول لك: اتواضع ، قوي قوي قوي..
انزل براسك قدام الله و قوله انا محتاجك، و ماليش غيرك .
. اتواضع مع الناس قوي و حط نفسك تحت الكل .. اتواضع في كلامك و فكرك و قلبك و عقلك ..
الشرير بيحرقه التواضع .. هو درع الكمال ، و هو استدرار لمراحم الله و قوته ..
و اوعي تخاف، ح يهرب ح يهرب.. ح يعمل لك هجوم يقويك
و يعليك و يبنيك و يشفيك.. حربه ح تعرفك قوة الهك ..
هو سنيد المتواضعين و حبيب المكسورين ؛
مش هو اللي طوب المساكين و قال أن الملكوت ليهم ؟؟