منتدى الفرح المسيحى - جربوا انكم تصلحوا اللي اتكسر

https://upload.chjoy.com/uploads/1529115306021.jpg

بحسن نيه .. اخويا قفل غطا علبة التابلوه وكان سلك الشاحن طالع منها
وبدون قصد منه ضغط بطريقة عفوية شديدة شوية ،، فكسر المفصله
رحت لحد يصلحهالي ، فقالي المفصله بلاستيك ومش هينفع ليها تصليح
وكمان فيه شوية شروخ تانيه حوالين المفصلة لو حاولت افكها واصلحها

,, العلبة هتتكسر معايا لقطع صغيرة ومش هتركب خالص ,,
الحل انك تجيب واحده استيراد غيرها
قولتله بكام .. قالي ب 500 جنيه
مبلغ كبير علي حاجه صغيرة لان العلبة بتتباع على بعضها .. مش المفصلة لوحدها

بعد مايأست .. جه صديق ليا قالي ولا يهمك انا هصلحهالك
كان ممكن اخاف لتتكسر لقطع صغيرة اول ماتتفك من مكانها زي ماقالولي ومتتركبش تاني
بس علشان كانت نية التصليح موجودة .. قولتله اتفضل
راح فكهالي براحه .. وجاب شوية أمير وشوية ايريال بتاع غسيل الملابس
وبدأ يحط علي الكسور الايريال وعليه نقط الامير
كنا بنشوف دخان طالع نتيحة تفاعل مادة الأمير مع الاريال
بس بعديها المفصلة بقت اقوى من الأول
وبالتالي بدأ يكرر نفس الطريقه مع كل حته مكسورة في العلبة
لحد مارجعت لكفائتها الطبيعيه زي الاول بالظبط
وكأن مكنش فيها حاجه

نفس الحال لما حد يكسر خاطرك بـ كلمة
وينوي انه يصالحك
فيسمع عبارة .. اللي اتكسر عمره مايتصلح
ومينفعش كوباية ازاز اتكسرت تتصلح لانها هتعورك .. وامثلة كتيرة من هذا القبيل

فييأس ويقرر انه يبعد
لكن صدقوني كل حاجه بتتكسر ممكن تتصلح في حالة لو كل واحد فينا عنده استعداد انها تتصلح

* انا اسف .. حقك عليا .. حقيقي انا مكنش قصدي
* ارجوك متزعلش مني .. انا غلطت في حقك واكتشفت غلطي
* انا استاهل اللي تحكم عليا بيه .. انا مستاهلش دموعك

وسائل كتيرة ممكن تطلع من القلب تداوي اي جرح
المهم تكون طالعه من القلب لناس عندها قلب .. مستعد انه يسامح
جربوا انكم تصلحوا اللي اتكسر .. بشوية محبة على شوية تسامح
هيتفاعلوا مع بعض ويعالجوا اي شروخ