اعتذار لمملكة الشّعر

مش مين ما كتب كلمة صار شاعر
ومش مين ما رصّف حروف صار قادر
الشعر مملكتو فريدي
مش كلّ فارس بيعرف يتصيّد طريدي
كتار كتير بينسبوا لإلهون الكلمة
من هون وهون بيجمعوها بعلبة
بينسوا إنّو الفرسان وأصحاب الكلمة العنيدي
بيسهروا ليالي لحتى يخيطوا حروف القصيدي
وتتزيّن بإحساس عالي وهمسة صلا اصواتها مديدي
يااا ريت يا اللي بتسرقوا الكلمة
وع حساب الشعر صرتو بالاسم شعّار
بمدرسة الحب والحنين بكلمة بحرف
مش رح توصلوا يا شطّار
الشعر مرجلة وارتجال بمحضر الأشعار
ان كان خواطر ولا قصيدي الها وزن وقافية
بكل وقت الشّاعر حاضر
سلاحو معو القلم والكلمة
ودفتر صغير دفيان بين ضلوعو
وفكر لا بل معمل من الأفكار
بتصير نهر هادر او شي إعصار

سعاد جعلوك
مع كل احترامي للشعر وللشعّار
هاوية أنا دائماً ولا أصنّف من الشعّار