منتدى الفرح المسيحى - إمتي هنصدق إن ايد لوحدها متسقفش

https://e.top4top.net/p_734zb82t1.png

إمتى هنعترف إن الحياة راجل وست ...!!
إمتي هنصدق إن ايد لوحدها متسقفش ومتقدرش تعمل حاجة ....
الراجل لو قوى مش هيفضل قوي من غير حنان
والست لو ضعيفة بقسوتك هتبقي وحشة وهتتكسر ...

العند اللي عايشينه بيدمرنا مش بيحل مشاكلنا
وان كان حد فيكم ان العناد والإصرار مع التاني هيخليه يمشيلك اللي في دماغك يبقي غلطان
ولو حصلت مرة مش هتحصل التانية وهتبقي أزمات متتالية ما بينكم
وحلها الوحيد الصمت والسكوت اللي هيولد انفجار مفاجيء في أي وقت .. !!

الراجل مهما كان هو مين بيحتاج لأم ....
ولو انتي مصرة انك تعملي اي حاجة من غير ما تكوني ليه أم
هيدور غصب عنه ع الاحساس ده في واحدة تانية غيرك ...
والست مهما قالت انها قوية وتعتمد علي نفسها وتشتغل وبتعرف تعمل المستحيل
اقل كلمة حلوة بتسحر قلبها وتخليها تميل
فلو انت بخيل عليها في مشاعرك هتلاقي الكرم من غيرك ... !!!

الفراغ العاطفي اللي بنشتكي منه احنا اللي بنبنيه وبنكبره بإيدينا واحنا اللي نازلين طالعين نظلم في نفسنا ونظلم في اللي معانا ...
البخل مش بخل فلوس وبس في بخل كلام وفي بخل مشاعر وفي بخل احساس .....
مش حاجة حلوة ولا انتصار هناخد علية جايزة لما واحد يفرض رأيه وخلاص ...
هو بيتكلم من خوفه أو غيرته أو علشان شايف ان كدا صح وانتي بتتكلمي من حبك طب ليه الخناق والشد والعند ويا هو كدا يا بلاش ....

ليه كلمة سيبني وشوف غيري بقت سهلة وليه الراجل بقي يدور علي واحدة تانيه تسمعه بدل اللي معاه ...
ليه بقت حرب والبقاء فيها للي يثبت انه صح ...
ليه تكسير قلوبنا بقي سهل أوي كدا ....

سواء راجل أو ست الاتنين ليهم قلب والاتنين بيتكسرو والاتنين بيحسوا
واللي بيفهم عارف ان الراجل بيحس بالتعب اكتر بس بعد فترة مش زي الست بتتكسر بسرعه وتتعب وبعدين بتنسي وتقوي ....
ربنا خلقنا غير بعض علشان نكمل بعض ونود بعض م علشان نحارب بعض ونعيب في بعض ....
ياتري الرسالة وصلت وصوتي ممكن يتسمع ويغير فينا حاجة ... !
ياتري في أمل ... !!
ياتري هنفوق ...!!