منتدى الفرح المسيحى - عادات سجنت حريات

https://upload.chjoy.com/uploads/1511373650831.jpg

شوفتهم يا حبايبى ..
طالعين من محل الموبيليا ..
مش قادرين يمشوا ..
شكلهم بيلفوا بقالهم كتير ..

وعينيهم مرهقة جدا ..
من الانوار اللى فى المحلات ..
واكيد كتر الموديلات اللى اتفرجوا عليها ..
ارهقهم ذهنيا كمان ..

بس برضه لقيتهم ..
عمالين يبحلقوا فى المحل اللى بعده ..
وبيتفرجوا على الموبيليا ..

سرحت فى الفترة دى ..
انى كنت رافض اعيشها كدة ..
وكنت عايز اروح اقول لهم كلمتين ..
عن المفاجأة ..
اللى مستنياهم بعد الجواز ..

بس قلت اكتبهم ..
وهم اكيد هيقروهم ..

اوضة النوم ..
اللى بتبحلقوا عينيكوا ..
وانتو بتتفرجوا عليها وبتختاروها ..

هتبقى المكان الوحيد ..
اللى هتدخلوه ..
عشان تغمضوا عينيكو وتناموا ..

حتى الانوار اللى هتبقى فيها ..
هتبقى هادية ..
وفى الاغلب النور مطفى ..

اساسا ضهر السرير ..
اللى كله شياكة ..
وممكن يكون السبب فى اختياركم ..

انتوا هتدوا له ضهركم ..
وياريت هتسندوا عليه علطول ..
دانتوا لازم تحطوا مخدة ..
تسندوا عليها ..
يعنى هتداروه ..

بجد مش هزار ..
نصيحة لكل اتنين بيتجوزوا ..

ماترهقوش بعض بتكاليف ..
وعادات مش لاقية اللى يوقفها ..

ثوروا عليها ..
لأن ياما عادات سجنت حريات ..

بس لو اتفقنا ..
هنعرف نغير حاجات كتير ..
ولو مش عشانا ..
يبقى عشان ولادنا ..