منتدى الفرح المسيحى - مقاصد الله عجيبه ...

https://c.top4top.net/p_685xjtgq1.jpg

مقاصد_الله
يوسف علشان يفهم قصد ربنا ايه من حياته فضل اكتر من 26 سنه مش فاهم 10 سنين منهم في سجن بدون اي هدف وكل يوم زي التاني ومفيش اي وعد من ربنا ليه يصبره على الايام دي...
وقبلها اشتغل عبد وبرضوا بدون هدف وفي الاخر اشتغل عند فرعون...

الغريبه أن في كل فتره من الفترات دي الكتاب يقول كان الله مع يوسف..
بس الحقيقة أن يوسف نفسه مش شايف ربنا حواليه...
وعلشان كدا طلب من الساقي انه يذكره قدام فرعون ممكن يكون دا الأمل ويطلعوا من السجن

لما بتخيل كدا يوسف كان ممكن بيفكر في ايه في السنين الطويله دي وازاي كان ممكن بيعتب على ربنا انه اترمي في بير من اخواته وهو كان واخد اكل ورايح يطمن عليهم...
أو ازاي اترمي في السجن وهو كان بيحفظ الامانه ومش عايز يخون فوطيفار إلى استئمنه على بيته...
وحتى كمان الساقي بتاع الملك ينساه سنتين كاملين وبعدها يشتغل عند فرعون 14 سنه يجمع فيهم قمح في المخازن
كل السنين دي ومش فاهم ايه قصد ربنا من كل دا...
لغايه لما لفت الايام واخواته ركعوا قدامه.. فهم وقال لإخواته
وَٱلْآنَ لَا تَتَأَسَّفُوا وَلَا تَغْتَاظُوا لِأَنَّكُمْ بِعْتُمُونِي إِلَى هُنَا، لِأَنَّهُ لِٱسْتِبْقَاءِ حَيَاةٍ أَرْسَلَنِيَ ٱللهُ قُدَّامَكُمْ.
اَلتَّكْوِينُ ٤٥:٥

يوسف السنين دي كلها بيفكر ازاي اخواته "سرقوه من بيت ابوه وباعوه"...
لكن بعد ما فهم انه الله هو الي خلاهم يعملوا كدا وفهم ترتيب ربنا قالهم "لا تتاسفوا" مش انتوا إلى عملتوا كدا دا ربنا هو الي ارسلني

مقاصد الله عجيبه وساعات كتير تمر علينا سنين وأيام واحنا مش فاهمين ليه مواقف صعبه بتحصلنا..
وساعات كتير نلوم على ربنا انه ساكت وكانه نسينا..
بس الحقيقة انك طول ما انتا عايش دا معناه انك جزء من خطه ربنا وبيكملها بيك بس ممكن لسه بتتدرب شويه علشان تكون مستعد اكتر
إِنَّهُ مِنْ إِحْسَانَاتِ ٱلرَّبِّ أَنَّنَا لَمْ نَفْنَ، لِأَنَّ مَرَاحِمَهُ لَا تَزُولُ.
مَرَاثِي إِرْمِيَا ٣:٢٢

افتكر كان عدي عليا وقت في حياتي وحتى الآن كنت لما بصحي الصبح سليم كنت بفكر ان دا يوم جديد من عند ربنا واكيد أن في اليوم دا حفهم قصد ربنا من حياتي..
وساعات الاقي حاجه جات قصادي.. اقول ايوه دا بقى قصد ربنا من حياتي..
وبعدين الاقي نفسي متعلق غلط.. وأفضل ادور تاني.. واثق اني في يوم ممكن افهم زي يوسف

وانتا كمان لو مش فاهم ربنا عايز ايه من حياتك وليك سنين كتير بتسأل خليك فاكر يوسف بعد سنين السجن الطويلة بدون هدف واضح كمل بقيت حياته ملك على كل أرض مصر وفهم أن ربنا هو الي رتب كل خطواته من اول البير لغايه الملك