منتدى الفرح المسيحى - حالة من غير أسم ...

https://b.top4top.net/p_677wxb4h1.jpg

مش عارف دى مشكلة فى طبع الانسان عمومًا ولا مع الوقت بقت متلازمة فى الناس ،
ان اى حد بيتعامل كويس مع الناس ، لازم فى المقابل ميلاقيش اللى المفروض يلاقيه ،
لما تتعامل بطريقة كويسة و بـ وِد و حب و تدى على قد ما تقدر ،
بتلاقى اللى قدامك يا اما قاعد مستنى اكتر لانه اتعود انه ياخد ،
يا اما بيعاملك بطريقة عكسية تماماً و يعاملك بطريقة مش كويسة او مفروضة .
الناس بقت تجبرك تتعامل بطريقة غير طريقتك و طبع غير طبعك علشان تلاقى ابسط حقوقك ،
اللي هي تلاقي معاملة عادية كويسة و نوع من التقدير المفروض ،

يعنى مع الحد اللى بتحبه ..
لما تفضل جامد و ماسك الكلام و مابتديش لا كلام ولا عاطفة ولا مشاركة ولا اى حاجه الا قليل جدا ..
بتلاقى الطرف التانى هايموت عليك و يعمل اراجوز علشان تبقي راضي عنه و تتعامل معاه كويس ،
اول ما تتعامل معاه كويس و بلطف و حنية و حب ، تلاقيه هو اتقلب و بقى عادى و بارد .

مع صحابك ،
لو فضلت تستحمل و تشيل و تعدى مواقف و تكبر دماغك ،
هايتعودوا عليك كده و كل شوية هايزودوا عليك ،
انما لو شخص قمّاص و بتتقمص من اى حاجه ،
هياخدوا بالهم و هايحسسوا عليك ،
ممكن من باب انهم ياخدوك على قد عقلك ،
او من باب انك بتزعل بسرعه و بتقفش ،
و فى الحالتين انت المستفيد و البنى ادم اللى بيكبر دماغه و بيتعامل بجدعنه و بيستحمل و يعدى هو اللى بيلبس و يشيل .

مع اهلك و القريبين منك ،
لما تتكلم و تهزر و تبقي انسان طبيعى ،
بيتعاملوا معاك بطريقة عادية و بيقللوا منك و بيتجاوزوا كتير فى الكلام و بيقولوا كلام ممكن يعلم فيك و يندمك انك اتكلمت و خليت فيه مساحة بينكم ،
لو فضلت مع نفسك و بتتكلم جد و على قد الكلام و راسم وش انك متضايق دايما و مكتئب،
هتلاقيهم بيحسسوا عليك و يهتموا بيك و يفكروا فى الكلام قبل ما يقولوه و تلاقى احسن معاملة .

انا مش عارف اسم الحالة دى ايه فى علم النفس ،
بس اللى متأكد منه انه خلل فى الطبيعه الانسانيه ، و بيأثر علينا كلنا ،
و بيخلى الواحد يتحول ل بنى ادم غير سوى علشان يُعامل معاملة سوية فى مجتمع غير سوى وسط ناس غير سوية ،
يا اما تفضل انسان سوى و تتعامل مع ناس غير سوية فتفضل مضغوط لحد ما تنفجر فيهم كلهم و فى الاخر تفضّل انك تنعزل و تكره كل الناس و تعيش مع نفسك .