منتدى الفرح المسيحى - الكنيسة ولا الكباريه

https://upload.chjoy.com/uploads/1509312400941.jpg

اتحرك يا ريس احمى الكنايس
الإرهابيين خلاص عليهم بيدوسوا
لا تطبطب ولا تهنن ولا تسايس
ولا ينفع معاهم دلع سوسو
هما اللى قتلوا ابونا سمعان
بفكر مليان وحشية و شراسة
اضربهم و اوعى تكون جبان
ربنا معاك هو الأمن و الحراسة
خليك معاهم قوووى و شديد
دى ديابة خلاص قلبهم ماااات
خلى ضربتك بيد من حديد
دول قتلوا اخواتنا فى الواحات
مع احترامى الكنيسة ولا الكباريه
معلش سؤال يجنن العقول
طبعا مفيش مقارنة يا بيه
يبقى اللى حاصل مش معقول
ترخيص الكباريه بيطلع بسهولة
ترخيص الكنيسة يا طلع يا مطلعش
دى حاجة غريبة و مش معقولة
فهمونا ايه الحكاية ياريت معلش
كنايس و عمال تقفل فيها
ولا حد عارف ايه السبب
حتى الأنوار ! بتطفيها
دى بجاحة و قلة أدب
الكنيسة دى بيت عبادة و نور
بتنادى تملى و تقول يارب
أما الكباريه رقص و خمور
و حاجات كتير توجع القلب
احمى الكنايس ياريت يا حكومة
كفاية بقى اهمال و تقصير
انتى اللى تملى عليكى اللومة
فى اى إرهاب و خراب و تدمير
انا مصرى و دينى الإسلام
و رسولى 1000 صلاة عليه
لو كان عايش لحد دى الأيام
كان هيحمى المسيحى و يفديه
الإرهاب لا له دين ولا له ملة
و ملعون أبو الفتاوي التكفيرية
دى شوية رعاع لكن مش قلة
ألحقنا ياريت لتبقى بلدنا جهنمية
كلمات : محمد فتحى