منتدى الفرح المسيحى - في يوم من الايام هعلّم بنتي :

https://e.top4top.net/p_654e9t191.jpg

في يوم من الايام هعلّم بنتي :

ان دواخلها اغلي من ان حد - متعبش كفايا - يوصلها !
و ان قلبها مينفعش يصُب إلّا لمّا يتأكّد إن اللي هينسكب منه مش هيُقع علي الارض !
و ان فيه ناس كتير احسن منها ، لكن زيّها مفيش !!
و ان اللي ميقدّرش تفرُّدها في كل شيء مينفعش تتفردله صفحة علاقه !

هزرع فيها يقين ،
ان جمالها فيه من جمال اللي خلقها علي صورته و مثاله ..
و ان اللي هيحبّها هيحبها علي ما هي عليه ،
و انها مش هتحتاج تبذل مجهود عشان تتحب !
المجهود بعد ما تتحب ، مش عشان تتحب !
و الفرق كبير !
و لو حصل انها احتاجت تبذل مجهود عشان تتحب ،
يبقي اللي قدامها بكل المقاييس اقل من اللي تستحقّه ..
تبقي مش في المكان الصح ، مش في مكانها !!

هعلّمها حاجه غريبه جداً ، و بتتشاف تخلُّف في زمانّا !
هعلّمها ان مفيش صداقه بدرجة انفتاح عاليه بين ولد و بنت ، ابداً !!
و ان الصداقه بين الجنسين ، معناها محبّة نقيه بدون الدخول في تفاصيل خاصه ،
و دايماً هيكون فيه حد محدّش يعدّيه في الكلام مهما كانت غلاوته عندها !
هعلمها ان الانفتاح العاطفي و كشف الدواخل غالباً بيجيب مشاعر ،
و المشاعر اغلي من انها تيجي و متتقدّرش !
اغلي من انها تديها لحد ميحسش بيها ، او يحس بيها و ميقدّرش قيمتها !

و انّها لازم هتحس
احنا مبنختارش مشاعرنا
احنا بنحس ، لكن بنختار هنتعامل مع مشاعرنا ازاي !

و ان كل الحواديت اللي متحكتش و التفاصيل اللي متعاشتش
و اللمسات اللي متحسّتش هيبقي ليهم طعم خاص جداً ،
لمّا تحوّشهم عشان تعيشهم لاول مرّه ، مع الانسان الصح !

و فوق كل ده
هعلمها ان مفيش حاجه اسمها " استثناء "
لان منذ بدء الخليقه و الاستثناءات هي اللي بتوجع القلب !!