منتدى الفرح المسيحى - عايزينهم يفكروا ويتخيلوا

ابني وهو صغير في المدرسة، في أمريكا...كتب موضوع تعبير...وأخد درجة نهائية.
أنشرح صدري بقى كده، وعشت في دور الأب المصري، اللي ضهره أنحنى في الغيط بيلم الدودة، لحد ما ابنه جاب درجة نهائية.
- ابن المبرمج بقى بيجيب درجة نهائية يا إنجي :d
ببص على موضوع التعبير...لقيت أخطاء إملائية...وكمان الخط وحش !
قعدنا مع المُدرسة، على وشنا الغضب والتربص بتاع أولياء الأمور المصري: إيه الأي كلام ده؟ إزاي الولد ياخود درجة نهائية، وعنده الأخطاء الإملائية دي، وكمان خطه وحش؟
المُدرسة بابتسامة: حضراتكم...الأولاد في المرحلة السنية دي...مش الهدف أبدا، إننا نقيمهم على أساس الأخطاء الإملائية، ده تقييم مختلف، بيتم في مرحلة تانية.
أحنا في المرحلة الحالية، عايزينهم يفكروا، ويتخيلوا، ويعبروا عن أفكارهم عن طريق الكتابة...بصرف النظر عن جودة الخط أو الأخطاء الإملائية!