منتدى الفرح المسيحى - ساعات احب الالم

https://upload.chjoy.com/uploads/1503266444231.jpg

ساعات كتير باحب الألم و باشوف إنه واحد من مكونات الكبران والتغيير
مش عاوزة أقول
إنه يمكن محدش بيكبر
من غير ألم
من غير اختيارات أصعب من اللي هو فيها،
من غير ما يخرج من الحته اللي مريحاه،
من غير ما يتحدي نفسه يجرب حاجة جديدة،
من غير ما يعافر يقبل اللي يمكن مش فاهمه و مُصر بكل الطرق يزقه أو يرفضه.
من غير ما يقبل يبقي ضعيف و محتاج مساعدة و مش عارف.
من غير ما يقبل إنه إنسان ممكن يغلط، و ممكن يكون مش كامل، وممكن ما يعرفش يعملها صح زي ما عاوز.
مين غير ما يقبل إنه ممكن يعيش باحتياج غير مسدد، ومش هيموت بس يتصالح و يقبل الألم ده. من غير ما يقبل الحقيقة إن الحياة مش زي الأفلام لازم نهايه سعيدة لا ممكن ماتبقاش سعيدة. من غير ما يقبل إنه لازم يتغيير مش الناس بس اللي تتغيير.
من غير ما يقبل إن خناقته مع الآخر هو كمان مسؤول عنها وإن مفيش جمله """"هما الوحشيين """
من غير ما يعرف يزرع جواه زرعة ألم، و زرعة أمل، و زرعه خوف، و زرعه آمان وزرعه حب، و زرعه وعي، وغضب، ورفض للمُضر والغلط لكن مش للإنسان،
و زرعة آحلام جميله بالخير و التغيير.....
يارب علمنا نقبل يبقي جوانا مشاعر كتير مختلفة جنب بعضن من غير ما نفقد طعمنا و نكهتنا لكن نعكز عليهم نكبر مش يخنقونا فنقف ومنكملش سكتنا.