منتدى الفرح المسيحى - مشكلة ٩٠٪ من رجالة مصر

https://upload.chjoy.com/uploads/1501573575431.jpg

واحد صاحبي كاتب قاللي ملحوظة احنا البنات بس اللي واخدين بالنا منها، وأول مرة أسمع راجل يعترف بيها..
قالي مشكلة ٩٠٪ من رجالة مصر أمهاتهم..
مخلوهمش يشيلوا آي مسئولية في بيوتهم، دوول حتى ما علموهمش يحطوا طبقهم في الحوض..
فأنتي عايزة واحد مش عارف عواقب ان طبقه يفضل على ترابيزة السفرة يعرف يشيل مسئوليتك أنتي وولاد وبيت؟

يا أمهات، ما تصحيش من النوم علشان تسخني الأكل لأبنك..
ما تخليهاش حاجة عادية أنه يطلب من الست اللي بتساعدكم في البيت تجيبله كوباية المياه..
لو سافرتي المفروض ابنك يعرف يشغل الغسالة لهدومه وينشر، عادي..
مش صح انك ترجعي من السفر تلاقي وحش سبت الغسيل التهم البيت..
ابنك المفروض هو اللي يفتح الباب..
ابنك المفروض يقف مع العمال، مش انتي ولا اخته علشان هو نايم..
يا إما هيتجوز ست ويقولها ما بأحبش وقفة العمال وتبقى شايفاه مش راجل..
يا ستات، ما تخربوش على ولادكم بدلعهم،
علشان الستات بقوا بيعرفوا يستغنوا عن الرجالة من كتر ما الرجالة بقت عالة عالستات..

الراجل عنده مسئوليات ودور في بيته ودي حاجة لا تقلل ولا تنتقص منه..
علموا ولادكم يبقوا رجالة..
يا إما في بنت هتدعي عليكي وأنتي عارفة دعوة الولية بترشق ازاي..
صباح الستات اللي بتعرف تربي رجالة..