منتدى الفرح المسيحى - زوادة اليوم: من شو بتعرف المسيحي؟

زوادة اليوم: من شو بتعرف المسيحي؟
بيخبّرو عن معلّمة من معلمات التعليم المسيحي، بيوم من الإيام بتسأل تلاميذها من شو بيعرفو الشخص إذا مسيحي أو غير مسيحي؟ أوّل طالب بيقلّها: «بيكون أكيد حامل صليب برقبتو»، التاني بيقلّها: «بيكون حامل مسبحة أو معلّق مسبحة بسيارتو»، التالت بيقلّها: «بيكون عندو صورة لمار شربل على زجاج السيارة، وكل مَرّة بيمرق قدّام مزار بيصلّب إيدو على وجّو»، المعلّمة بتقلّن: «كل إجاباتكُن صحيحة، بس في طريقة غير هودي، بتخلّي الآخرين يعرفو إنّو نحنا مسيحيين، شو هيّي»؟ بعد صمت كتير كبير، أحد الطلاب يلّي ولا مَرّة بيشارك بصف التعليم المسيحي بيرفع إيدو وبيقلّها: «إنّن بيحبّو بعضن».
الزوّادة اليوم بتدعيني وبتدعيك
لحتى نعيش المحبة يلّي ما بتعرف حدود، وهيك منكون عَم نبيّن للناس عن مسيحيّتنا، مش بالكلام والعلامات الأرضية، إنما بمحبّتنا على مثال الجماعة المسيحية الأولى، والله معكن.

https://scontent.fbey6-1.fna.fbcdn.n...96&oe=5A0CC78A