منتدى الفرح المسيحى - حاسس أني "مصري" شويه انهارده!

https://upload.chjoy.com/uploads/1497641721261.jpg

إحساس بالوجع، بالذل، بالعار، بالكتمة، والكبسة والكمدة، باللخبطة وعدم القدرة على التعبير،
بالرغبة في أن اللي عايشينه ده يكون كابوس هنصحى منه، إحساس بالضعف وقلة الحيلة، إحساس بالوطنية الشديدة والخيانة العظمى في نفس الوقت.

إحساس أنك بتدفع تمن جهل الأغلبية على الرغم من أنك ملكش ذنب في جهلهم;
إحساس بتحسه بعد كل حدث بيتقتل فيه ناس عشان بس كانوا رايحين يصلّوا،
بعد كل حدث بيتقتل فيه مجنّد يمكن يكون أخوك أو صاحبك عشان بس حظه قاده لمكان قرر الإرهابي اعتباطاً أنه يهجم عليه;

إحساس بالتبرأ من آراء حد - عن علم أو غير علم - دعم العك اللي أحنا فيه بكلمة "نعم تجيب النعم!" أو أي كلام مماثل;
إحساس بالإجبار لما يبقى المرة الوحيدة اللي يمنحوك فيها حق الاختيار، يخيروك دايماً بين سيئ وأسوأ!

إحساس تعجّب من عدم رغبة البعض في الفوقان من الأوهام، واختيارهم للاستمرار في البلادة والمكابرة عشان يتوجعوا أقل،
لأن الفوقان من الصدمة معناه اعتراف بالخطأ، وده أغلى عندهم من دم ناس بتموت!;

إحساس بأن دمك غالي، وأنهم ميستاهلوش أنك تهتف وتتقتل عشانهم!
آخرهم هيشيروا صورتك ويزعلوا كام يوم وخلصنا. أما أهلك وحبايبك هتسيبلهم وجع العمر كله;

إحساس بيتكرر بشكل شبه يومي في البلد دي، لدرجة أني شايف أنهم ممكن يجمعوا مجموعة الإحاسيس دي ويسمّوها في علم النفس باسمنا.
لما حد يحسها يقول أنا حاسس أني "مصري" شويه انهارده!

cpd