منتدى الفرح المسيحى - بكاءآ مع الباكين

بولس الرسول ف رسالته لأهل روميه الاصحاح ال 12 .. بيوصينا وصيه يمكن تبان انها غريبه شويه .. بيقول ايه .. "فرحآ مع الفرحين وبكاءآ مع الباكين" .. طيب "فرحآ مع الفرحين" وعرفناها .. بس "بكاءآ مع الباكين" يعني ايه ؟!
يعني لما اقابل واحد مخنوق ومتضايق .. احسسه اني مقدر مشكلته و تعبه مهما كان ف عينيا بسيط .. ومقولوش كلام لا بيودي ولا بيجيب .. زي " انت احسن من غيرك _ مش لوحدك اللي متضايق" .. لو عندي كلمه حلوه اقولهاله لكن لو معنديش اسكت
يعني لما حد يفضل يحكيلي عن حاجه وجعاه .. مكتفيش ب كلمة "معلش" .. "معلش" دي اكتر كلمه مستفزه ممكن تتقال لواحد موجوع و مكتئب ..
"بكاءآ مع الباكين" يعني احس ب وجع غيري وكأني انا الموجوع .. يعني اشاركه حزنه و ألمه وتعبه .. يعني دموعي تنزل علي دموعه وكأن الجرح ف قلبي انا .. يعني لو معرفتش اشيل عنه مزودش عليه تعبه .. يعني اوقات كتير وقت وجعنا بنحتاج لحد يكون حاسس بينا وبس .. مجرد وجوده جنبنا ف لحظة الضعف دي بيقوينا وبيسندنا .. مش لازم يقول كلام حلو علشان نرتاح .. كفايه انه يفضل معانا ف الوقت ده .. كفايه جدآ