منتدى الفرح المسيحى - لكل مرنم ولكل خادم

لكل مرنم ولكل خادم
طبعا كلكم عارفين المرنمه سوسنه اللي بترنم ترانيم العذراء بدرنكه في اسيوط في شرايط الكاسيت اللي صوتها جميل كدا وهادى وبنسمعها في كل الدير بدرنكه باسيوط
اللي ماتعرفوهوش بقي ان المرنمه دى كانت مكرسه
ولما كانت بترنم في كنيسة رئيس الملائكه باسيوط .. كانت بترنم من وراء الستار
يعني ماحدش كان بيشوفها نهائي إلا أب اعترافها وزملائها المكرسات فقط
وحتي لما كانوا بيسجلوا ليها شرايط كاسيت .. كانت برضوا بتوقف خلف ستاره
فضلت بترنم من خلف الستار لمدة 40 سنه الي ان تنيحت بسلام في 2002 ميلاديه
انا كاتب البوست دا لكل واحد اخذ الخدمه تجاره .. او شغلانه .. او وقت بيزنس
شوفوا الست الطاهره العفيفه اللي اسمها سوسنه كانت خافيه نفسها ازاى
في عز ان دلوقتي فيه ناس ممكن يتخانقوا علي المايكات
وكل واحد عايز يظهر افضل من التاني حتي ولو علي حساب الاخر
وبكتب البوست دا كمان لمروجى الاشاعات علي ناس كان كل هدفهم انهم يخدموا بامانه
وشغالين تجريح وبيفرضوا اشاعاتهم علي مسامع ناس والغريب ان احيانا الاشاعات بتتصدق
بس ربنا هو اللي وازن القلوب وكاشف خفايا القلب وعارف مين اللي بيخدم بامانه بجد
وربنا قادر انه يكشف المستور او يتحنن علي المظلومين بانه يعطيهم الصبر
وكمان بكتب البوست دا وبهديه لكل اصحابي وحبايبي
الخدمه دى خلوها في دمكم .. اخدموا لاخر لحظه في عمركم
اخدموا مهمــا حصـــل ومهمــا بيحصـــل ومهمـــا هايحصـــل كمــان
اخدموا .. وربنا الوحيد هو اللي بيقيم خدمتكم ..
وماتنتظروش تقييم من بشر حتي لو كانوا عاملين نفسهم خدام وبيعارضوكم
شكرا للمرنمه المتنيحه سوسنه علي الدرس الجميل اللي اتعلمناه من حياتك
عشتي غريبه في الدنيا ولكنك كنتي قريبه من خالق الدنيا ..