منتدى الفرح المسيحى - البنت

البنت_الجدعه

https://upload.chjoy.com/uploads/1492533786271.jpg

ايوه انتي ..
ياللي حاسه انك تعبتي
م الهموم
والدموع جرحت عيونك
كل يوم
والملل صاحبك .. وقلبك
اللي بينام فيه يقوم
والوجع دلوقتي ساكن
كل حاجه حلوه فيكي
ايوه انتي ..
ياللي مش لاقيه اللي حاسس بس بيكي
ياللي مبقاش حد ليكي
ربنا باعت يقولك ..
انه فاكرك مش ناسيكي
وانه هيطبطب عليكي
وان بكره هيبقي احلي
واللي جاي مفيهوش جراح
اللي جاي احسن واجمل
م اللي فاتك واللي راح
قومي تاني وشدي حيلك
اجمدي وميهمكيش
متخافيش ..
ليه بقالك كام يوم متضايقه ؟!
حاسه بوحده ف وسط الناس
مودك مقلوب كل شويه
بتعدي الايام وخلاص
ساكته وهاديه وراضيه بحالك
في ايه .. مالك
بصي كويس تلقي قلوب
حاسين بيكي و باللي جرالك
حتي ولو مش حاسك حد
قلبك لازم انه يعيش
والبنت الجدعه بتستحمل
وبتضحك اكتر .. وتكمل
ف اضحكي بقا ومتضايقيش
تكشيرتك ملهاش ولا لازمه
والاسود مش بيليق بيكي
لا دموعك هتحل الأزمه
ولا خوفك يوم هينجيكي
لسه ف عمرك احلام تانيه
اصل الفرحه بتيجي ف ثانيه
اخرجي من اوضتك للدنيا
بطلي حزن الله يخليكي
متخليش حاجه تخليكي
مكتئبه وخايفه قلقانه
اضحكي بقا الله يخليكي
مش قادر اشوفك زعلانه
عافري شويه .. خديها تحدي
كل اللي بيحصل بيعدي
واللي يقولك مالك .. ردي
قولي انا حلوه وكله تمام
بيني انك جامده بجد
مش واحده خلاص اي كلام
شيلي دموعك مش مستاهله
اللي يعيش اهو ياما يشوف
عايزك تبقي ب مليون راجل
مش خايفه ووشك مخطوف
ربنا هيعوض ايامك ..
بطلي خوف ! 💝
" مينا مجدي "