منتدى الفرح المسيحى - مشاعر مش مفهومة

https://upload.chjoy.com/uploads/1490305426051.jpg

جربت قبل كده ماتبقاش فاهم مشاعرك، تحس انك متلغبط، الإحساس ده مؤلم ومُحيّر!
لما تفقد شخص عزيز عليك، " أب - أم - أخ أو حتى صاحب ليك قريب منك " وتلاقي نفسك مش قادر تستوعب اللي بيحصل، من ناحية انت مطمن ومتأكد انه ارتاح وراح لمكان افضل من هنا بكتير، ومن ناحية تانية أنت صعبان عليك فراقه! مش بتبقى قادر تشوف أي حاجة تانية غير الحزن والألم اللي انت بتمُر بيه ..

المشاعر دي كلها بيقدرها يسوع لأنه مر بنفس التجربة دي قبل كده، الرب يسوع مرة بكى عند قبر لعازر بالرغم من انه عارف انه هيقوم وانه هو اللي هيعمل المعجزة وان الغم والكأبة اللي هما فيها دي بعد شوية قليلين هيتحولوا لفرحة كبيرة، إلا انه احترم مشاعر اخواته ( مريم ومرثا ) وقدّر ضعفهم وحتى رغم الكلام اللي قالوه.. ساندهم..

لو بتمر في موقف صعب، وحاسس بكسرة جواك ماتكتمش مشاعرك جواك، اتكلم وخرجها قدام ربنا، هو بيقدر يشفي وبيسند وبيدعم وبيقوي، مكتوب عنه في الكتاب المقدس " يَشْفِي الْمُنْكَسِرِي الْقُلُوبِ، وَيَجْبُرُ كَسْرَهُمْ"
"لأَنَّهُ فِي مَا هُوَ قَدْ تَأَلَّمَ مُجَرَّبًا يَقْدِرُ أَنْ يُعِينَ الْمُجَرَّبِينَ" ..