منتدى الفرح المسيحى - السيد المسيح أكتر ''جنتل مان

اكتر شخص احترم المرأه وفهمها .. هو السيد المسيح
هو الوحيد اللي عرف يسند المكسوره .. و يطمن الخايفه .. و يداوي المجروحه .. عمره ما بص للبنت من برة :)
السيد المسيح أكتر ''جنتل مان'' قدر يفهم طبيعة البنت و يقدرها .. كان بيخصص وقت من يومه علشان يقعد مع مريم ومرثا الغاليين علي قلبه .. علشان كده كان طبيعي ان المريمات و ''النساء الذين تبعنه'' يفضلوا جنبه ومعاه لحد الجلجثه ف عز ما كل حبايبه اتخلوا عنه ..

''السامريه'' اللي بتدور ع الحب ف قلوب غيرها ومش لاقياه .. اللي عاشت ف حضن اكتر من راجل وبرضه محستش بالأمان .. راحلها بنفسه لحد البير .. مقالهاش انا جاي اعاتبك ولا الومك .. هو بس شاورلها ع السكه الصح .. ورواها بميه اللي يشرب منها ميعطش تاني ..
..
''المرأه التي أمسكت ف ذات الفعل'' .. اللي مسكوها متلبسه وجابوها عشان تترجم .. كل الناس كانت شايفاها من بره والسيد المسيح بس اللي شافها من جوه .. حماها من نظرات الناس الجارحه .. ودافع عنها .. طبطب علي قلبها المجروح بحنيه تدوب الجبال .. و غفرلها خطيتها بكل حب
..
''ساكبة الطيب'' اللي غسلت رجليه ومسحتها بشعر راسها .. كل الناس اللي كانوا موجودين اتضايقوا م اللي هي عملته .. شافوها تافهه وبتعمل حاجه ف نظرهم مالهاش لازمه .. لكن هو كان فرحان بيها .. و مكسفهاش
..
''مريم المجدليه'' .. علشان كان عارف ان قلبها خايف ومحتاج يتطمن .. اختارها تكون اول حد يعرف ان قام .. فرحها ف عز ما كانت مكسوره وفاقده الأمل .. و رد روحها ب قيامته
..