منتدى الفرح المسيحى - ازاي اتعامل مع الفشل فى خطوات محدده

ازاي اتعامل مع الفشل فى خطوات محدده (هات ورقه وقلم )

1- حدده
يعني انا فشلت فى كذا
مثال: انا فشلت اني اعمل الجزء ده من الشغل ده 5 مرات بلاش التعميم حدده فى تصرفات معينه

2- حاسس بايه ؟
كوني فشلت فى الجزء ده ده مخليني حاسس بايه (حزن-ضيق-يأس) ايا كان الاحساس اتواصل معاه واسمح له يبقى موجود لأن رفضك ليه بيزوده اول خطوه انه يمشي انك تقبله وتسمح له يبقى موجود

3-تقدر تقبل انك فشلت ؟
ايه اللى هيحصل لو سمحت لنفسك انك تقبل انك فشلت فى الجزء ده اللى حصل حصل تقبله علشان يعدي (انا متقبل اني فشلت فى الجزء ده )
لو فشلت في 5 حاجات اكتب 5 حاجات نجحت فيها حتي لو نجحت اتكلم او امشي

4-اتعلمت ايه ؟
انا اتعلمت من التجربه دي 1-2-3-4
دول كنز التجربه اللى المفروض يبقوا حلقه فى ودنك فى التجارب الجايه

5-محتاج ايه ؟
محتاج ايه علشان انفذ الدروس اللى اتعلمتها من التجربه دي
(كورسات_ مهارات _تدريب )

6-اول خطوه ؟
ايه اول خطوه المفروض امشيها دلوقتي حالا علشان ابتدي واكمل

7- هتحس بايه ؟
تخيل لو نفذت الخطوات دي وخدت الدروس دى حلقه فى ودنك ودخلت بيها التجارب الجايه هتكون حاسس بايه كمان شهر -شهرين -6 شهور ؟
طب لو اتعاملت مع كل فشل بالطريقه اللي فوق دي هيكون حالك ازاى بعد 10 سنين
طب لو لزقت الفشل فيك وقولت انا فاشل وكل مره عملت كده هيكون حالك ازاى بعد 10 سنين
دلوقتي انت قدامك طريقين طريق جربته وطريق لسا مجربتهوش اختار