منتدى الفرح المسيحى - خليهم يختاروا ...

ناس كتير لازم تفهم إن العلاقة بين الأب و الأم و عيالهم مش علاقة امتلاك ...
مينفعش تحطوا عيالكوا تحت ضغوط نفسية عشان تمشوهم تحت طوعكوا و تحولوهم مع الوقت لنسخة مصغرة منكم ...
مينفعش تجبروهم على حاجة لمجرد أنك فشلت تعملها و أنت صغير ....
( كان نفسه يطلع دكتور معرفش ... فأجبر ابنه أنه يدخل كلية طب اللي بقاله عشر سنين مش عارف يخلصها لأنه مش حاببها و الناس كلها بتقله يا فاشل ... )

مينفعش تختاروا ليهم ...
مينفعش تساوموهم على رضاكم عليهم مقابل أنه ينفذوا أوامركم حتى لو كانت ضد سعادتهم ...
( لو عملت كذا عمري ما هرضى عنك ... لو معملتش كذا أمك ممكن تموت فيها .... ) ...

أصعب حاجة في الدنيا أنك تندم على حاجة أو تفشل في حاجة مكنتش من الأول اختيارك ...
حاجة فرضت عليك بالإكراه .... دي ندمها بيموت ...
ندم بيبقى مصحوب بكراهية و غضب ...
و كتير إحباط و يأس و عدم الرغبة في الاستمرار و المحاولة من جديد ....

خليهم يختاروا ... و يتحملوا عواقب اختياراتهم إن أساؤوها...
أو يفتخروا بنفسهم لو وفقوا فيها ... خلوهم يقعوا و يقوموا و يتعلموا و ينشفوا ...
ادعموهم في اختيارتهم لو حاسين انها صح ...
و حذروهم مرة و اتنين و عشرة لو حسيتوا بالخطر ...
بس متفرضوش عليهم قرارات حياتهم .... حنوا عليهم ...
و متعاقبهمش بالحرمان من الطبطبة ...
متقفلوش أبوابكم في وشهم لما يغلطوا و يندموا ....

متبقوش أنتوا السبب في إن عيالكوا يطلعوا ضعاف الشخصية و مهزوزين و معندهمش ثقة لا في نفسهم و لا في غيرهم ....
كفاية عليهم العالم الخارجي ....