منتدى الفرح المسيحى - ده مينفعش تحبه ....

(مينفعش حد يحبك الحب ده كله....و متحبوش....) ...
لا ينفع ...

https://upload.chjoy.com/uploads/1488224603141.jpg

ينفع لما الحب الكبير ده ييجي على صورة حب امتلاك و استحواذ ...
حد ممكن يقدملك روحه ... بس تفضل معاه ... معاه و بس ...
حد تاني مش مسموح ... مفيش صحاب ...
مفيش علاقات تحت أي مسمى ...
مفيش حياة ... أنا حياتك ...
ده حب مرضي ...
حب كبير ...بس مؤذي ....
حب يخنق ... ده مينفعش تحبه ....

ينفع لما الحب الكبير ده جاي من شخص احتياجاته العاطفية أكبر من طاقتك ....
عاوز اهتمام بزيادة ... عاوز وقت بزيادة ...
عاوز تركيز بزيادة في أدق التفاصيل ....
عشان مع كل غلطة ... عمدا أو سهوا هتلاقي كمية غضب تحبطك ....
هتحسسك أنك أسوأ شخص في العالم ...
لأن اللي بيدهولك ميجييش نقطة في بحر من اللي بتقدمه ....
لأن ببساطة ... طاقته أكبر من طاقتك...
و جوعه العاطفي و حرمانه ... بيخليه متعشم في كل ردة فعل ....
ده مينفعش تحبه ...
عشان أنت كده بتئذيه ... سيبه للي يكفيه و يكتفي بيه ....

ما ينفعش لما الحب الكبير ده يبقى جاي على صورة ابتزاز عاطفي ....
حد بيقدملك كل حاجة و مش بيديلك فرصة حتى ترفض....
كل ما تيجي تقول لا ... يديك أكتر ....
علاقة ابتزاز أساسه الإحساس بالشفقة ...
ده مينفعش يتحب ... لأنه أصلا مبيحبش نفسه ...
و اللي ميحبش نفسه .. عمره مهيعرف يسعدك ....

محمد منير اختصر حاجات كتير لما قال ... (يا اللي أنتي حبك حرية ....) ...
أنجح العلاقات الإنسانية صداقة أو ارتباط عاطفي ...
بتقوم عالتوازن ... و الراحة النفسية ...
اللي بييجوا لما تدي الشخص اللي أدامك مساحته الشخصية ...
متلجمش اختياراته ... متخيروش بينك و بين أي حاجة تانية ....
ما تطلبش منه حاجة مقابل حاجة ....
منتهى الأمان أنك تكون مع شخص مش فارض عليك شروط للبقاء و قابلك بكل ما فيك ....
حد مش بيغير من حب الناس ليك ... و لا من نجاحك ...
حد بيدعمك في كل اهتماماتك و اختياراتك ....
وواثق فيك....أنك مهما كبرت و عليت ...
مهما دايرة معارفك و حبايبك كترت...
في وسط الجموع ... هتدور عليه ... و تمسك ايده ...
و تبص معاه للكاميرا ... و تضحك ....