منتدى الفرح المسيحى - اوعي تفقد الروح

https://upload.chjoy.com/uploads/1486069999061.jpg

٤ مشاهد

المشهد الاول : عصام الحضري اللي عنده ٤٤سنة ولسة بيلعب وبيتألق ... عصام الحضري اللي كلنا قولنا خلاص راحت عليه وكنا بنتريق ونقول جمايكا .. عصام الحضري اللي بعد ما ساب الاهلي قولنا مسيرته انتهت . عصام الحضري كان ممكن يعتزل لما كان عنده 36 سنة زي شوبير ويقدم برنامج " مع الحضري " ويترشح عضو مجلس الشعب عن دايرة " كفر البطيخ " ويطلعله كرش ويبقي مترهل .. بس عصام الحضري عنده روح وهي دي اللي خلته يكمل

المشهد التاني : عمرو دياب اللي كمل ال ٥٥ سنة اللي قاعد علي قمة الغناء في مصر من ٣٠ سنة ... شيرين لما اتريقت عليه وقالت انه خلاص راحت عليه وعجز ... عمرو دياب مردش عليها بس هو نزل فيديو وهو في الجيم كأنه شاب عنده ٢٥ سنة ... عمرو دياب كان ممكن يقول خلاص انا كبرت واركز في شغلي وبس .. ورغم انه في سن محمد فؤاد بس فيه فرق كبير بين الاتنين ... عمرو دياب عنده اصرار و روح بتخليه يكمل

المشهد التالت : حسام حسن الاسطورة واكبر لاعب يجيب جون في تاريخ كأس افريقيا لما كان عنده ٣٩ سنة ... حسام حسن سنة ٢٠٠٠ لما كان عنده ٣٤ سنة حصلت له مشكله مع النادي الاهلي بس هو عنده اصرار انه يكمل ومرضاش يعتزل .. حسام حسن راح الزمالك واخد معاهم ٣ دوري و بطولة افريقيا .. لما ساب الزمالك راح المصري ... حسام حسن بطل كورة وهو في الاربعينيات ... لو قارنا حسام حسن بميدو ... هنلاقي ان الفرق بين الاتنين هو الاصرار والروح رغم ان الاتنين موهوبين

المشهد الرابع : شباب صغيرة في السن كلها يأس واحباط .. شباب بتحس انها عجزت وخلاص راحت عليها رغم انهم لسه بيبتدوا حياتهم ... الامثله اللي فوق هي امثله واقعية وموجودة واتحدت كل الناس اللي قالتلهم خلاص راحت عليكم ... الامثلة اللي فوق العامل المشترك بينهم هو الاصرار وروح العزيمة

اوعي تسمع كلام اي حد بيقولك انت متقدرش
اوعي تسمع كلام حد يحبطك ويقلل من عزيمتك
اوعي تفقد الروح

الانسان من غير روح ميت