منتدى الفرح المسيحى - ليه بلاش العيش إلحاف ؟

ليه بلاش العيش إلحاف ؟

العيش و منتجات الدقيق بشكل عام من الكاربوهيدريت البسيطه
يعني اول ما بتدخل الجسم،بتتهضم بسرعه جدا و تتحول لسكر
السكر الي جاي من الكاربوهيدريت البسيطه بيعلي نسبه السكر في الدم بشكل يفوق المعدلات الطبيعية

و بعد وقت قليل اوي تنزل نسبه السكر في الدم بصوره مفاجأه
و تعمل جوع و نرفزه و قريفه و كسل و عدم تركيز
و كل ده بياثر علي النمو الصحي لجسم الطفل !

طب ما احنا اترببينا علي كده ؟؟
صح !
كام منا صحته ١٠٠٪‏ ؟

نسبه السمنه و أمراض القلب و السكر زادت بسبب اكل الكاربوهيدريت البسيطه و الاعتماد عليها كمصدر أساسي للغذاء

الهرم الغذائي الكلاسيكي..الي قاعدته الكاربوهيدريت من الرز و المكرونة و العيش ده حصله تطوير عالميا
بعد ملاحظه نسبه زياده الأمراض المزمنه و زياده تسبه السمنه و السكر في المراهقين

و اخر تطوير للهرم ده كان في ٢٠١١ و اصبح طبق متوازن من الخضار و الفاكهه و البروتين و الحبوب

يعني اكلنا للعيش إلحاف واحنا صغيرين سبب في مشاكلنا الصحيه الي بنعاني منها واحنا كبار

غير ان الدقيق الأبيض او حتي البني مفيهوش غذاء للطفل
يعني بياكل بس كاربوهيدرات بسيطه..نسبه كالوري عاليه..و غذاء ؟؟

بيسد نفسه عن الاكل المفيد
و بتصبح عاده من العادات السيئه في نظامه الغذائي

طب الحل أيه ؟
الحل اننا نركز علي الأكلات ذات القيمه الغذائيه العاليه
و دايما نوفر سناك صحي مت فاكهه او خضروات ذات الألوان المختلفة في متناول أيد الطفل

و مش لازم يأكل عيش مع كل الوجبات

فيه بدائل كتير من الحبوب الكامله كمصدر الكاربوهيدريت و الطاقه..بجانب الفاكهه و الخضار

عندنا البليله و الفريك و الرز البني
العدس و الفول و الحمص
انواع الحبوب و البقول المختلفة

و خلي دائماً في بالنا
ان نمو الطفل و جهاز مناعته نتاج الاكل الي بنوفرهوله

خليهم يكبروا بصحه و يتهموا بنشاطهم و ذكائهم