منتدى الفرح المسيحى - الحرف يقتل(بساطة مش تعقيد)

https://upload.chjoy.com/uploads/1485845914011.jpg

فرحان جداً اني شوفت النموذج ده قدامي
من يومين كنت في كنيسة معينة بصلي ، والأطفال كانت بتلعب وكان صوتها عالي جدا ، لدرجة الناس بدأت تزعق وتبص ليهم علشان مش عارفين يركزوا في الصلاة
كنت مستني الحركة الشهيرة اللي البعض بيعملها ، ان ابونا يوقف الصلاة ويخبط خبطتين علي المايك ويفضل ساكت لحد مالصوت يتمنع او لحد ما الأمهات تطلع سكاكين وتدبح عيالها ، او ياخدوا عيالهم وميجوش تاني
لكن ابونا بصراحه فاجئني ، مش انا بصراحه اللي اتفاجئت لوحدي ، الأمهات نفسها اتفاجئت
ابونا وقف الصلاة وخرج من المذبح وخد كل الأطفال في ايده ودخلهم معاه الهيمل بملابسهم العادية وولع ليهم شمع ومسكهولهم وقالهم اقفوا جنبي هنا وخلوا الشمع منور وامسكوه حلو وركزوا في نوره علشان ميلسعكمش
الأطفال كانت واقفه بتبص علي الشمع ومركزه فيه اوي وواقفه بكل ثبات
بس مش دي المفاجأة ،
المفاجأة الاكبر وقت التناول قال جملة مش قادر انساها
قال اللي محتاج للتناول فعلاً وعنده ظروف قهرية تمنعه انه يتناول " يجي يتناول ، بس وعد بينه وبين ربنا أول ما القداس مايخلص يروح لأب اعترافه ويعترفله انه اتناول لأنه كان محتاج السر العظيم ده

نسبة كبيرة جدا من اللي واقفين اتناولوا ، وبعد الصلاة كانت كل مكاتب الأباء عليها زحمة

بعد القداس سألته , بقوله هو انت اللي صح ولا هم اللي صح !
قالي اكيد كل واحد فينا صح من وجهة نظره ، بس الأطفال لما تلاقي شخط وزعيق مش هتيجي تاني , والمسيح كان طول عمره يحب لمة الاطفال حواليه , وانا دخلتهم يقفوا حواليه ، ومرة في مرة هيجوا بدري علشان يقفوا جنبي
وبخصوص التناول ، ده سر عظيم مينفعش تيجي عند الملك وتقوله مش عايز منك حاجه
طالما جيت ، يبقي انت محتاج لكل سر في القداس ،
وبعد كده يقول لأب اعترافه انه كان محتاج للتناول ومقدرش يمنع نفسه

#بساطه_مش_تعقيد
الحرف يقتل