|
بعاقب ولادي ازاي
بعاقب ولادي ازاي (الحلقه الاولي ) الشده والعقاب ولا الطيبه والحنيه والدلع مفيش حاجه ملهاش ميزه وعيب من رحمه ربنا اللي أتربي بطريقه منهم صحيح عنده تحديات بس اكيد في مميزات كتير في شخصيته يعني اللي أتربي بالشده والعقاب ممكن نلاقيه متحمل المسئوليه مستقل شخصيته قويه بيتحمل المواقف الصعبه بس في المقابل ممكن نلاقيه عملي زياده مش بيدي مشاعر البشر اهميه مهاره الحنان والاهتمام والحب عنده مش احسن حاجه ولو الموضوع راح الاوحش ممكن يكون عنده في بعض الأحيان تكبر وتسلط وقسوه قلب ووممكن الشده تطلع شخصيه تفتقر الشجاعه في بعض الأحيان ومتعوده في معظم قرارتها علي السمع والطاعه والتبعيه طيب واللى اتربوا على الدلع والحنيه هيطلعوا شخصيه عندها مهاره العطاء والحب والاهتمام والاستماع والكرم مميزه ليها فعلا بس في المقابل هنلاقي مهارات تانيه زي تحمل المسئوليه والتفكير العقلاني والالتزام محتاجه شغل كتير واللي ممكن لو راحو الاوحش يبقي عندنا في بعض الأحيان شئ من الإنانيه وعدم القدره علي ضبط النفس او تحمل المشاكل وانهيار واكتئاب وقلق من اقل مشكله لان خبرات الحياه اللي مروا بيها بتبقي بسيطه فَلَو اتعرضوا للضغوط بيلاقوا صعوبه في تحملها وممكن يعملوا افعال انتقاميه وحاده جدا قصاد مواقف عاديه والنَّاس ديما تلفت نظرهم ان ده اوفر جدا وأنهم مكبرين المواضيع طيب نعمل ايه ؟؟؟!!! نربي بالشده والحزم ولا الرفق واللين ولا اقولك مواقف كده ومواقف كده مره تشد ومره تطبطب ااااااااه استنوا كده بقي هياخدوا ايه صفات الطيبيين ولا الجامدين طيب لو قلتلكم ان التربيه الايجابيه بتجمع الحزم والحنان في نفس الوقت تخلي الطفل حازم وجد وحنين ومسئول وملتزم ومرن بيتعاطف بس عارف حقوقه يا سلام طب ده ازاي بقي؟؟؟!!!! |
رد: بعاقب ولادي ازاي
بعاقب ولادي ازاي (الحلقه التانيه) قبل ما أكلمكم عن أدوات التربيه الايجابيه عايزه اخدكم في رحله الي مخ الانسان ♥️ لو عندنا طفلين طفل متفوق دراسيا وطفل فاشل دراسيا وعملنا امتحان صعب الاتنين والاتنين سقطوا الطفل المتفوق هيعمل ايه اكيد هيحس بالاحباط وهيعيط وبينهار وبيبقي مش مصدق وبعدها هيهدي ويجري علي الكتب يذاكر ويشوف ليه كده هو قصر في ايه ويصلح غلطته لانه عارف نفسه وواثق فيها عارف انه شاطر ومش قابل علي نفسه مستوي اقل طيب هو عرف ازاي انه متفوق اولا بيعرف يذاكر ثانيا بيلاقي نتيجه ثالثا بيتلقي التشجيع والتقدير علي النتيجه دي فأصبح عنده ثقه في نفسه في المذاكرة طيب الطفل الفاشل هيحس بالاحباط غالبا لا لانه عارف انه فاشل مفقدش حاجه عشان يزعل عليها هو وصل لحاجه اعلي من الاحباط بكتير اسمها اليأس واللامبالاه وصله منين الياس ده !!! لانه عارف انه مش بيعرف اصلا يذاكر ولا يحصل فبتالي مش هيعرف يحل المشكله طول الوقت بيتقاله كلام محبط ويتعاقب علي درجاته ويتبهدل من القريب قبل الغريب وحتي لو حال يبقي كويس ودرجاته اتحسنت شويه مش دي النتيجه اللي الناس بتقدرها الناس مش بتقدر غير الدرجه النهائيه والكمال اي حاجه اقل من الكمال تبقي فشل فبعد شويه يبطل اصلا يحاول طيب كلنا حسينا ان ده بيحصل بشكل تلقائي من غير اتفاق مسبق بين البشر ياتري مخنا بيشوف الفشل والنجاح ازاي تعالوا اقولكم في هرمون في المخ اسمه الدوبامين الهرمون ده مسئول عن ايه ١-التركيز ٢-الاهتمام ٣-الالتزام والتحكم في الغضب ٤-السعاده ٥-التحفيز والتحمس الهرمون ده لما بيعلي دول كلهم بيبقوا تمام والهرمون ده بيعلي في حاله ان الانسان عنده صوره ذهنيه كويسه عن نفسه اللي هي الثقه بالنفس مثال لو انا واثق في نفسي في المطبخ لو اطلب مني عزومه هتحمس وهقوم اشتغل وانا سعيد وحتي لو في اجهاد مش بيفرق معايا طيب ليه ربنا يخلي هرمون واحد مسئول عن كل ده لو وقع كل دول يقعوا ولو طلع كل دول يطلعوا عشان متلاقيش نتيجه من إننا نحبط بعض ونهز ثقه بعض ونعرف اذا عايزيين النجاح يبقي نتعلم وتتدرب واتشجع علي اي مجهود حتي لو بسيط ولو جه حد وقع او احبط لانه غلط نشجعه انه يصلح غلطته ويتعلم منها ونقوله اننا واثقين فيه فيتأكد له انه محبوب وموثوق فيه حتي لما يبقي بشر بيغلط لان ببساطه اللي حصل حصل المهم اللي الجاي يعني من الاخر العقاب بيعقد المشكله ومفيش عقاب عندنا في بدائل كتير طيب الام دلوقتي هتقولي انا مش بعرف اعمل كده هقولها متزعليش من نفسك عشان توصلي لدرجه دي من النجاح والتفوق انت نفسك لازم تبقي قدوه متعلمه المهارات الاجتماعيه (التحكم في الغضب وأداره الضغوط -مهارات التواصل والاستماع مهارات الدفاع عن النفس والاحترام المتبادل ومهارات التعاون والتفاوض والحلول الوسط ومهارات تقبل الاخطاء ومهارات حل المشاكل ومهارات تقبل الاختلاف) وطبعا ده بعد ما تكوني وفرتي لابنك الاحتياجات الأساسيه اللي من محبه ربنا لينا انها لما بتنقص الطفل بيسئ السلوك عشان ننتبه انه ناقصه حاجه ونوفرها واللي هنتكلم عنها هي والمهارات في الحلقات الجايه ولو شايفيين الموضوع صعب مش لوحدكم في الأف الأمهات كانوا شيفينه صعب زيكم وبدأوا الطريق وبيحاولوا ويجاهدوا ويقعوا ويقوموا بس علي رأيهم النتيجه تستاهل وراحه ضميري تستاهل وفخري بولادي يستاهل |
رد: بعاقب ولادي ازاي
ميرسى ربنا يباركك
|
رد: بعاقب ولادي ازاي
ربنا يبارك حياتك |
رد: بعاقب ولادي ازاي
ميرسى لمروركم الغالى
:):):) |
رد: بعاقب ولادي ازاي
ميرسي على مشاركتك الجميلة رينا
|
رد: بعاقب ولادي ازاي
ميرسى لمرورك الغالى
:):):) |
| الساعة الآن 05:00 PM |
Powered by vBulletin® Copyright ©2000 - 2025