منتدى الفرح المسيحى - العياط عند الأطفال

سرعه بكاء الطفل الحساس بتلاقي مننا ردود افعال مختلفه اما اننا بنقوله
(متعيطش بطل عياط الراجل ميعيطش )
واما بنعمله اللي هو عاوزه برضه عشان يبطل عياط!!!

https://upload.chjoy.com/uploads/1484302513531.jpg

طيب سؤال كده هو العياط بيبقي ارادي ولا لا ارادي
طيب انت شايف ربنا ميز الانسان بالعياط كوسيله للتعبير عن المشاعر ومخلاش الحيوانات تعرف تعيط ليه
ليه ربنا يخلق مكان في المخ اسمه ال(hypothalmas)
بيطلع موصل عصبي اسمه ال( acetyl choline )
عشان تدي استجابه للجهاز المسئول عن الدموع عشان تنزل الدموع من العين ومعاه هرمونات وبروتينات زى ال ( leucine -enkephalin)
ودي مسكنات الألم طبيعيه
وتكون نتيجه ده انك تحس انك احسن بعد ما تعيط ومش بس كده انك تقدر تتواصل مع اللي حوالليك من غير كلام وتخليهم يخلو بالهم انك محتاج مساعده

وهنا يجي اختبار المحيطين بيك هيتعاطفوا معاك وهيقدروا ان دموعك لا اراديه نتيجه لمشاعر لا اراديه
ولا هيتهموك بانك
مزعج
زنان
مش راجل
عيل نكدي

طيب اتصرف ازاى لما ابني يعيط
اولا افرح انه بيخرج المشاعر اللي جواه لانه لو كتم العياط ده ومعبرش عن اللي جواه ده بيعمل سلوك عدواني بعد كده او ممكن يؤدي اللي شخصيه منسحبه قلقانه علي طول نتيجه انها مش بتخرج اللي جواها
او ممكن شخصيه منحسه عندها لا مبالاه مستمره
وكتير من الاطفال تركيزه بيتاثر جدا ودوّل اللي بيتقال عليهم عندهم احلام يقظه وسرحانيين علي طول

طيب خلاص كده اقتنعنا ان التعبير عن المشاعر مهم مهم مهم
طيب ازاي اتعامل مع الطفل لما يعيط
١-انزل لمستواه وأقوله حاسس بيك انك (غاضب -محبط-قلقان )
٢-اطلب منه انه يحضني وأقوله انا محتاجه حضن لو رفض بكرر تاني انا محتاجه حضن لو رفض بقوله انا محتاجه حضن لما تقدر انا مستنياك هناك وأمشي من قصاده غالبا هو هيجي ورايا ويحضني

طيب ايه اهميه الحضن
الحضن أهميته ان الانسان وقت العياط الجزء المسئول عن التواصل الاجتماعي (prefrontal cortex )
بيبقي متوقف عن العمل ومن عظمه خلق الله اننا لما بنحضن بعض بيطلع هرمون مهم جدا اسمه الاوكسيتوسين وهو المسئول عن الحب والتواصل الاجتماعي
يعني ابنك غصب عنه بيبقي غير متواصل مش قاصد انه ميسمعكيش غصب عنه ملوش دوا غير حضنك ونظره التعاطف اللي ممكن تديهاله
الحضن دوا وساعات كتير بيبقي هو الحل الأسرع والأكثر فاعليه
ولما يهدي اسمعه
اسمعه
واشرح راي
وأوصل معاه لحل متعاون
يحترم رغباتنا احنا الاتنيين
ومره علي مره مع الاحتواء والنقاش افقه يوسع وتقبله يزيد والنوبات تقل

الحكايه مش حكايه مجهود الحكايه حكايه احساس