منتدى الفرح المسيحى - البطرسية مش آخر الأوجاع

فى زيارة الكنيسة البطرسية انهاردة ..

من على باب الكنيسة ..
قابلت واحد من مسئولى الكشافة ..
صوته منبوح ..
لأنه بقاله 3 ايام فى الشارع ..

لقيته بيسألنى ..
هو حد معاه صورة ..
الراجل اللى السيسى قال عليه ..

قلت له على موبايلى ..
لسة هاوصفه له ..

لقيته بيقوللى .. اسمر ورفيع ..
ووشه ملخبط كدة؟

قلت له : أه ..

قاللى : يبقى هو ده اللى جه ليلة الحادث بالليل ..

ولما شاف صورته على موبايلى اتأكد

قاللى دا جه بالليل الساعة 11
وكان عايز كتب دينية ..
بحجة انه عايز يفهم عن المسيحية ..

ولأن طريقته غريبة ..
اتكلمنا معاه ومشيناه ..

سبت الراجل بتاع الكشافة ..

ودخلت الكنيسة ..
واستأذنت انى اصور بموبايلى ..

صورت الاعمدة والايقونات ..
والارضيات والشبابيك ..

لحد ماجيت جنب دكة ..
عليها الكتاب المتقطع ده ..
وعليه الدم .. زى الصورة ..

ومفتوح على الصفحة اللى فيها الكلام ده ..

- بل نكون مستحقين لسماع صوتك الحنون
- تعالوا الىّ يا مباركى ابى رثوا الحياة الدائمة
- يأتى الشهداء حاملين عذاباتهم
- ايها المسيح كلمة الآب .. اعطنا سلامك ..
- سلامى انا الذى اخذته من أبى انا اتركه معكم من الآن والاى الابد
- يا ملاك هذا اليوم الطائر الى العلو بهذه التسبحة .. اذكرنا اما الرب ليغفر لنا خطايانا ..

ولا يهمنى ..
السيسى بيقول الحق او لأ .. رغم انى عارف انه بيقول الحق ..
ولا يهمنى ..
الراجل فجر نفسه .. ولا قنبلة فى شنطة انفجرت ..
ولا يهمنى ..
اللى عمل كدة راجل ولا ست ..

كل اللى يهمنى ..
ان الرسايل اللى ربنا بيبعتها ..
ماتتوهش وسط المناقشات والشتايم والتشكيك ..

الواحد خايف يموت وهو بيتناقش ..

وعلى فكرة ..
#البطرسية_مش_آخر_الأوجاع

أمير تادرس